MORA’G mga vanishing island ang mga center island sa kadalanan sa Davao City, Sabado sa gabii, Abril 10, 2021, gumikan sa pagbaha nga dala sa kusog nga bunok sa pag-ulan.
Giingon sa usa ka netizen sa post niini sa iyang Facebook, diin iyang gihulagway sa kapsiyon sa iyang piktyur ang daw vanishing island ang mga center island sa kadalanan sa Davao City kay di makita kon mobaha gumikan sa dali dayon nga pagtaas sa tubig.
Halos nagduha ka oras ang gilanat sa kusog nga ulan diin unang giapawan ang ubos nga bahin sa Jose P. Laurel Avenue (Bajada) partikular atbang sa usa ka karaang mall.
Miawas sab ang tubig ug gilapawan ang canal barrier sa Roxas Avenue sanglit natunong sab ang pag-ulan nga taub ang dagat.
Sa Uyanguren Street (Ramon Magsaysay Avenue), milapaw sab ang tubig sa pavement sa kalsada.
Halos taga tuhod sab ang gilawmon sa tubig sa Torres Street, diin nanulod na sa mga restawran ang tubig baha.
Sa ubos nga porsiyon sa Maa, mao sab ingon man ang pipila ka bahin sa Puan, McArthur Highway ug sa ubos nga bahin sa Bangkal area.
Miapaw sab ang tubig baha sa Aurora-Quezon Street ug pipila ka area sa Boulevard.
Sa kasamtangan, padayon ang gobyerno sa pagbutang og mga dagko nga culvert isip pagpalambo sa drainage system sa dakbayan.