WALAY nakakuha sa "hits" sa pusta sa tong-its kay naabtan sa mga pulis ang tulo ka sugarol nga nagbaraha sa Sitio Santa Marina, Barangay Binugao, Toril, Davao City alas 2:35 sa hapon niadtong Sabado, Abril 10, 2021.
Ang mga nasikop mao sila alyas Boben, 32, construction worker; alyas Emilyn, 49; ug usa ka alyas Maribel, 44, pulos nagpuyo sa Barangay Binugao ning siyudad.
Sumala sa kapulisan sa Toril police nga gipangunahan sa hepe nga si Police Major Michael Uyanguren nga human nila nadawat ang impormasyon, gilayon nilang giambakan ang dapit.
Nakuha sa posisyon sa mga dinakpan ang usa ka set sa baraha ug P500 nga pusta.
Gipangkustodiya ang mga nahisgutan aron mapasakaan og kaso karong adlawa didto sa korte. (Jeepy P. Compio)