GILUNOPAN ang mga ubos nga dapit sa probinsiya sa North Cotabato alas 7 sa gabii, Sabado, Abril 10, 2021.
Sa taho gikan sa Provincial Disaster Risk Reduction and Management Office (PDRRMO-Cotabato), nasayran nga siyam ka mga lungsod ang gibaha nga gilangkuban sa Makilala, Magpet, Antipas, President Roxas, Kabacan, M'lang, Pikit ug Midsayap.
Kasagaran sa gibahaan kadtong haduol sa mga suba ug irrigation canal.
Samtang, nakulgot sab ang mga biyahero sa diha nga midahili ang yuta sa kalsada sa may Barangay Greenhills, President Roxas.
Gihulagway nga sa Barangay Sta. Felomina, Makilala lagpas tawo ang tubig-baha ug naguba pa ang hanging bridge.
Ang pagbaha sa Makilala gumikan sa pag-awas sa Makilala River gikan sa tiilan sa Mount Apo.
Sa Barangay Luhong, Antipas, kulgot sab ang mga sakyanan gumikan miawas ang sapa nga milunop sa kalsada.
Ang nasinatian nga pagbaha ug pagdahili sa yuta sa probinsiya nunot sa kusog nga pag-ulan sa nagdaut nga lakat sa panahon.
Nagpasidaan ang PDRRMO-Cotabato sa mga namuyo daplin sa kasapaan ug kabukiran nga mag-amping kanunay sa pagbaha ug pagdahili sa yuta. (Edgar E. Fuerzas)