MANAGTIAYONG negosyante naangol human gipamusil samtang nangatulog pa nianang alas 2:00 sa kaadlawon sa Dominggo, Abril 11, sa Poblacion, Barangay Sabang, dakbayan sa Danao.
Si Edita Sanchez Santillan, 56, ug ang iyang bana nga si Oscar Santillan, 57, ang samdan.
Si Edita nakaangkog samad pinusilan sa iyang wala nga totoy, samtang ang bana nga si Oscar, samdan sa tuong tiil.
Si Police Corporal Gerome Pesidas, imbestigador sa Danao Police Station nga nahinabi sa Superbalita Cebu, nagkanayon nga ang managtiayon nangatulog kini sa ilang tindahan sa RTWs.
Nakamata nalang sila dihang nabati ang sipang buto sa armas.
Pipila ka minutos nakabatyag silag dugo nga midagayday sa ilang lawas dayon nabatyagan ang kasakit.
Nangayo silag abag sa mga tawo tupad sa ilang tindahan ug gidala sila sa tambalanan.
Apan gibalhin sila sa tambalanan sa dakbayan sa Sugbo sanglit seryoso ang samad sa asawa.
Sumala sa mga biktima nga wala sila masayod kinsay namusil kanila.
Wala say nakakita kon unsay gisakyan sa suspetsado.
Ang mga biktima mibutyag sa kapulisan nga wala sab silay kontra o tawo nga gikaaway.
Taga dakbayan sa Sugbo sila apan dugay na nga naninda sa maong lugar.
Matod ni Pesidas, nga estoryahon pa nilag balik ang magtiayon aron makakuha silag dugang detalye.
Tan-awon sab sa kapulisan kon wala bay kalambigitan sa negosyo ang krimen.