TUNGOD sa duha ka mga kaso sa gipamaak og iro, ang Cebu City Health Department (CHD) niluwat og pasidaan sa publiko nga magbantay.
Si CHD officer-in-charge Jeffrey Ibones niawhag sa nagbuhi og mga iro sa pagpabakuna niini og anti-rabies.
Matod ni Ibones, kadtong napaakan og iro, kinahanglan mopaubos dayon sa medical intervention.
Dugang ni Ibones, ang anti-rabies vaccine libre.
Nihangyo siya sa publiko sa pagpakig-coordinate sa ilang barangay halls o health centers.
Nipasidaan usab sa namuhi og iro nga kanunay kining pabugnawan o liguon.
“Kani atong mga iro, mura ra sad ni sila og tawo, ato gyud na paimnon og tubig labi na rong ting-init,” matod ni Ibones.
Ang CHD nipahinumdom sa publiko bahin sa skin diseases nga komon matag summer.
“Kasagaran kay katol-katol,” dason ni Ibones.
“Mga dapaw-dapaw sad sa mga bata nga magduwa sa gawas,” dugang niya nga daghan sa bukirang dapit niini.
Ang mga edaran kinahanglan dili magpainit human dali kini mahutdan og tubig sa lawas.
Kaon sa balanseng nutrina, pahuway ug igo ehersisyo maoy labing maayo, tambag sa doktor. “Kung magsige’g puwaw, inom, nya tabako, mo-low ang resistensya,” dason ni Ibones. (JJL)