BISAN sa isyu sa pakigbatok sa coronavirus disease 2019 (Covid-19), ang masa dunay mahukmanon papel sa pagsanta sa virus. Isip labing bagang hut-ong sa katilingban, ang masa magdala sa dakong tuyok ngadto sa bag-ong pag-asa.
Apan asa na ang bakuna para sa masa? Naa gihapon sa medical frontliners ug essential workers kutob sa pagkakaron? Naa pay pipila ka trapo (traditional politician) nga nag-una-una pa o nisingit sa pagbakuna.
Tinuod nga daghang limitasyon ug dili sayon ang pagkuha og bakuna tungod sa kalibotanong demanda sa bakuna sa Covid-19. Sa kaso sa ubang medyo kabus nga local government units (LGUs), nagpaabot og grasya gikan sa nasudnong kagamhanan. Pagkaluoy sad sa mga masa ning dapit.
Ang LGUs dinhi sa Metro Cebu, sama sa kaulohan ug ubang adunahang LGUs, niadto pa nabalita nga andam ang ilang pundo. Apan asa na dapita ang vaccination campaign sa masa? Unsay nakapaaginod sa programa sa sama sa dagan sa bao. Kon nakasukad na, mas maayo. Kon wala pa, pag-resign na lang kamong mga opisyal nga nagdumala sa pagbakuna.
Dili kaha maayo Bise Mayor Mike Rama ang hagit? Duol na ang mosunod nga eleksiyon. Segurado nga usa kini sa mga nag-unang isyu unya sa matag kandidato.
Panahon nga matutokan ang naa sa masa alang sa paspas nga pagtapos sa gubat batok sa pandemiya.
Way hinungdan ang pagpaluag-hugot sa estado sa kuwarentina (apan gikinahanglan sab pagnalipod sa usa ka dapit). Makadaut sa ekonomiya. Impeyernong kasinatian. Nakalabang na kita niini nga dili na kita mobalik pa.
Mopadayon kita sa unahan ubos sa bag-ong normal. Apan asa na ang bakuna sa masa?