Nadela: Ambulansiya para sa TCH

ANG mga disgrasya nga nanghitabo sa Trans Central Highway kun TCH dili bag-o. Kaniadto diha nay daghang kinabuhi nga nakalas tungod sa disgrasya. Ang mga disgrasya naglakip sa mga sakyanan nga nawad-an og brake, nabangga, nahulog sa pangpang, nasunog ug mga motorsiklo nga naligid, nibalitok ug nabangga. Sa mga imbestigasyon nga gihimo, napalgan nga may mechanical problem ang nadisgrasya nga mga sakyanan.

Ug ang labing subo nga laing hinungdan nga nilutaw kay human error. Kay human error posibling gibaliwala sa driver ang batakang balaod sa karsada kansang katuyo-an mao ang pagpreserbar sa kinabuhi. Sa ato pa, nagpabaya ang driver. Karong bag-o gipiyestahan sa netizens ang sunodsunod nga disgrasya sa TCH.

Nagkadaiyang opinion gipagawas. Apan nakalimtan nila ang usa sa importanting bahin kon maghisgut ta og kinabuhi. Way ambulansiya nga makarespondi dayon kon may disgrasya sa TCH.

Manawag pa og tabang sa lungsod sa Balamban.

Hinuon kon pabor sa dakbayan sa Sugbo, may mga barangay diha nga nag-operate og ambulansiya. Ambot lang sab kon sangkap ba sa mga gamit. Kay di man matagna ang aberya ug disgrasya, akong sugyot nga ang Barangay Gaas, Balamban tukoran og command center, nga sangkap sa daghang ambulansiya ug medical responder.

Dili lang TCH ang ilang monitoron apil na ang mga silingang barangay sa bukid. Gawas niini, rescuers nga sangkap sa mga modernong gamit ang nakaestambay sab kanunay sa command center para sa ubang alarma sama sa landslide, baha ug uban pa. Kini nga sugyot gawas nga makaluwas og kinabuhi, makapalig-on sab ni sa turismo sa mga bukirang barangay nga kanunayng dagsaan og mga bisita.

Sa ato pa ang atong mga bisita makabaton og kompiyansa nga kon duna silay pamation sa lawas diin nameligro ang ilang kinabuhi, may mga medical responder sakay sa ambulansiya ang daling masampit. Imbes manukad sa patag, atong balihon. Sa mga alarma sa bukid, ang morespondi magikan na sa bukid. Unsang utoka nang ang parespondihon sa lungsod o sa siyudad pa manukad.

Lain nga angayang patalinghugan, ang atong sugyot nga may road o motorists assistance team nga iladlad sa tanang kadalanan. Tuyo niini mao ang pagsiguro nga ang maaberya nga sakyanan dili mahimong hinungdan nga mokalit lang og kahuot ang bul-og sa trapiko. Haum ni sa mga dapit nga gikaluhaan og problema sa trapiko. Example, ang South Road Properties sa Cebu Citu ug South Coastal Road sa Talisay City.

Mokalit lang og huot ang bul-og sa trapiko kay may sakyanan nga naaberya. Ang assistance team nga nagbahasbahas sa maong karsada daling morespondi ug mapugngan ang pagkasiyakoy sa bul-og sa trapiko. Ingon ra niana ka simple. Dili kay paabuton pa ang wrecker pun-an sa daghang seremonyas kay pabayran diay ang ilang serbisyo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph