SUPERBALITA CEBU

Makapaukyab nga kadaugan

NAGKADUOL na ang Bol-anong boksidor nga si Mark Magsayo ngadto sa iyang pangandoy nga moduwag world title fight, kini human siya mipakita’g maayong labok didto sa Estados Unidos kagahapon.

Gipatulog sa 25-anyos nga si Magsayo ang iyang kontra nga si American Pablo Cruz sulod lang sa upat ka rounds sa ilang 10-round featherweight fight sa Mohegan Sun Arena, Connecticut.

Gihunong ni referee John Callas ang away human gipalukapa ni Magsayo sa ikatulong higayon si Cruz pinaagi sa makusog nga solid right straight sa fourth round.

Nagpabiling walay pilde si Magsayo ug miuswag kini ngadto sa 22 ka mga daog inubanan sa 15KOs.

Sa makapaukyab niyang kadaugan, hayan dako ang purohan nga mahatagan si Magsayo og mas dako nga away sa sunod niyang balik sa ring.

Mao kini ang ikaduhang kombati ni Magsayo sa Estados Unidos ubos sa paggiya sa sikat nga trainer nga si Freddie Roach.

Sa unang away ni Magsayo, midaog kini pinaagi sa decision niadtong Oktubre sa miaging tuig.

Sukwahi karon ang gipakita ni Magsayo kay sa sayo pang bahin iya nang gipakitaan og kusog ang beteranong si Cruz.

Unang gipatumba ni Magsayo si Cruz sa second round. Nasundan na pud kini og lain nga knockout sa third round. Gitiwasan ni Magsayo si Cruz apan naka-recover kini ug nakahuman sa round.

Gihuwat ni Magsayo ang saktong higayon ug sa fourth round nakapasulod siya og right straight nga maoy nakapatumba kang Cruz sa ikatulong higayon. Ning higayuna, gihunong na referee ang away.

Sa pagkakaron, si Magsayo ikalima sa World Boxing Council (WBC) ug International Boxing Federation (IBF), ikawalo sa WBO ug ika-10 sa World Boxing Association (WBA).

Sa nangandam pa si Magsayo ning maong away, gipadayag na niini nga maningkamot siyang mapagawas ang mabangis nga abilidad batok kang Cruz aron mahatagan siya’g higayon nga makaduwa og world title fight.

Nahimong doble ang selebrasyon alang sa Filipino boxing fans ang adlaw nga Domingo kay nagmalampuson man pud sa pagdepensa sa iyang IBF super flyweight title si Jerwin Ancajas.

Ang tulo ka judges miiskor sa duwa og 115-112, 116-111 ug 117-110 tanan pabor kang Ancajas.

Misaka ang rekord ni Ancajas ngadto sa 33-1-2 nga adunay 22KOs samtang si Rodriguez mihagsa ngadto sa 22-2 ug 16 KOs. (RSC)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph