SUPERBALITA CEBU

Siquijor mipukan sa Dumaguete

■ EX-PBA: Ang kanhi PBA player nga si Ryan Buenafe maoy nangulo sa kadaugan sa Siquijor Mystics batok sa Dumaguete Warriors, 105-100, sa main game sa Chooks-to-Go Pilipinas Vis-Min Super Cup Visayas leg niadtong Sabado sa gabii, Abril 10, 2021 sa Alcantara Civic Center sa lungsod sa Alcantara, Cebu. / WORDPRESS.COM

NAKAISKAPO ang Siquijor Mystics sa mga kamot sa Dumaguete Warriors, 105-100, sa main game sa Chooks-to-Go Pilipinas Vis-Min Super Cup Visayas leg niadtong Sabado sa gabii, Abril 10, 2021 sa Alcantara Civic Center sa lungsod sa Alcantara, Cebu.

Gibuhat sa Mystics ang malisod nga tahas sa dihang nakabalik kini sa duwa og midaog pa human malubong og 19 puntos sa Warriors.

Luyo sa pagpangulo ni ex-PBA player Ryan Buenafe, nakabuylo ang Mystics sa ikaupat nga hugna sa duwa.

Miiskor si Buenafe og utso puntos sa fourth quarter aron aswaton ang iyang team ngadto sa makutas nga kadaugan.

Mitapos si Buenafe nga adunay 24 puntos, unom ka rebounds ug unom ka assists. Si Desmore Alcober miamot og 22 puntos, 11 rebounds, lima ka assists ug tulo ka steals, midugang si Miguel Castellano og 13 puntos, 12 rebounds, samtang si Gene Belleza ug Juan Aspiras mitampo’g 11 puntos matag-usa alang sa Siquijor.

Importante ang kadaugan alang sa Siquijor kay gikan pa sila sa masakit nga kaparotan batok KCS Computer Specialist-Mandaue City sa ilang unang duwa sa miaging Biyernes.

Misaka ngadto sa 1-1 nga rekord ang Mystics samtang ang Dumaguete adunay 0-1 nga baraha.

Si James Earl Regalado ug Ronald Roy maoy nangulo sa Dumaguete nga adunay 18 puntos matag-usa, samtang mitunol og 15 puntos si Jaybie Mantilla, 12 puntos si Nikki Monteclaro ug 11 puntos matag-usa si Jerick Nacpil ug Mark Doligon.

Sa laing bahin, mipakita sa iyang kahait ang ARQ Builders-Lapu Lapu City Heroes sa ilang debut game human nila gilunod ang Tabogon Voyagers, 75-61.

Mitali og 12 puntos, seven rebounds ug two assists si Dawn Hynrick Ochea alang sa Heroes. Mitunol pud og 12 puntos, six assists ug tulo ka steals ang beteranong wingman nga si Reed Juntilla, samtang si Ferdinand Lusdoc midugang og 10 puntos ug Jojo Tangkay adunay utso puntos ug unom ka rebounds.

Wala’y player sa Voyagers ang nakabuhat og double digit. Si Jethro Sombero ug Peter de Ocampo lamang ang misidlak sa Tabogon nga adunay nuebe puntos matag usa. Mopakitag aksiyon ang ARQ pagbalik karong Martes alas dos sa hapon batok Dumaguete City. (RSC)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!