Nakuhaan og kinilong shabu ang usa ka bodegero nga napatay sa mga sakop sa Provincial Intelligence Unit sa Cebu Police Provincial Office (CPPO) ug PNP Drug Enforcement Group atol sa buy-bust, ala 1:20 sa kaadlawon sa Lunes, Abril 12, 2021 sa Barangay Catarman, Lungsod sa Cordova, Cebu.
Ang napatay giila nga si Joven Angalan Silong, hingkod, taga sitio Mahayahay, Barangay Pasil, Siyudad sa Sugbo apan lumad nga taga Surigao.
Nakuha gikan kang Silong ang tulo ka kilo sa gituohang shabu nga kolor yellow brown nga adunay Dangerous Drugs Board (DDB) value nga P20,400,000 lakip na ang buy-bust budol money nga P500,000 ug P1,000 nga tinuod nga kwarta.
Sigun ni Police Brigadier General Ronnie Montejo, hepe sa kapulisan sa Central Visayas, nga duha ka semana nila nga gi-monitor si Silong human nigawas ang iyang ngalan nga maoy tinubdan sa illegal drugs.
Sa dihang ilang na-transact si Silong, giplano dayon ang buy-bust ug nahukman didto sila mag abot sa Cordova.
Sa dihang nag binayranay na, giiingong nabantayan ni Silong nga pulis ang iyang gika transact hinungdan nga niuna kini sa pagbunot sa gi loklok nga .45 kalibre nga pistola.
Apan dali nga nakamatikod ang pulis nga poseur-buyer hinungdan nga iya kining giunhan nga niresulta sa pagkaigo sa dughan ni Silong sa makatulo ka mga higayon.
Gisuwayan siya sa pagtabang sa medical team sa ambulansya sa Lungsod sa Codrova, apan nakabsan siya sa kinabuhi.
Sa gihimong imbestigasyon sa PRO 7, nasuta nga adunay direktang contact si Silong sa usa ka drug lord nga naa sa dakong bilanggoan sa kaulohan nabalhog.
Ang durugista nga binilanggo maoy motawag usab sa iyang tawo nga naa sa Mindanao aron mopadala kaniyag 10 kilos sa gituohang shabu nga mahurot usab sulod lang sa duha ka semana bugti sa P30,000 nga suhol.
“Base sa nahibaw-an nato, maka distribute kini siyag mga more or less 10 kilos in two weeks,” matod ni Montejo.
Dugang ni Montejo nga usa ka low grade nga matang sa shabu ang ilang nakuha sukwahi sa moabot nga supply nga gikan sa Luzon sanglit ginama man kini sa gawas sa nasud.
Gituohan sa PRO 7 nga gihimo sa nasud ang maong butang tungod sa kaubos sa quality niini nga mao usab karon ang ilang subayon kon asa kini gihimo.
Ipasusi usab ni Montejo ang nasakmit nga shabu sa PNP Crime Laboratory aron masiguro kon unsay gisagol niini.
Mohimo pa usab silag lawom nga imbestigasyon kon unsa nga grupo nahisakop si Silong pinaagi sa paghiling sa iyang cellular phone nga naa sa kustodiya sa Regional Intelligence Division 7.
Gipasidunggan ni Montejo ang team nga nakasakmit sa illegal nga drugas.
Hatagan niya kinig P50,000 nga reward nga mao usab ang kamandoan ni PNP Chief Police General Debold Sinas kanila.
Ang hepe sa kapulisan lukop nasud midasig sa iyang mga sakop nga hingusgan ang kampanya batok sa ilegal nga drugas.
Kon makasakmit kinig kinilo, adunay pahalipay ang Camp Crame kanila gawas sa rekomendasyon.