COTABATO CITY -- Giihaw sa mga armadong grupo ang usa ka mag-uuma alas 7 sa gabii, Dominggo, Abril 11, sa probinsya sa Maguindanao.
Giila ang biktima nga si John Daya Benito, 46 anyos, minyo ug nagpuyo sa Datu Hoffer Ampatuan, Maguindanao.
Gibutyag ni Maguindanao Police Provincial Director Colonel Donald Madamba nga samtang didto ang biktima sa iyang payag sa uma nga nagbantay sa maisan niini sa pag-atake sa mga baboy ihalas, kalit lang mibutho ang wala mailhing mga armadong tawo ug gipusil kini gamit ang M16 Armalite rifles.
Abtik sab nga miikyas ang mga suspetsado paingon sa hilit nga dapit sa Datu Hoffer Ampatuan.
Patay on the spot ang biktima nga natusak-tusak sa bala sa nagkadaiyang parte sa iyang kalawasan.
Muabot na sa 20 ka lumad nga Teduray ang namatay gumikan sa pagsulong sa mga armadong grupo sa bukiron nga dapit sa Datu Hoffer gumikan sa bangi sa yuta nga ilang giugmad.
Hustisya karon ang singgit sa pamilya sa biktima nga gipatay nga kapila na kahigayon nga gihimo sa ilang tribu.
Sa kasamtangan, ang kapulisan sa Datu Hoffer Ampatuan Maguindanao ang padayon nga nag-imbestiga kalabutan sa maong hitabo. (Edgar Fuerzas)