DUGANG 33 ka mga kaso sa coronavirus disease (Covid-19) ang natala sa Cagayan de Oro sulod sa duha ka adlaw, tulo niini mga locally stranded individual (LSI) ug 30 ang mga local transmissions.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 4,331.
Sumala ni Acting City Health Officer Dr. Lorraine Nery, sa 30 ka mga bag-ong lokal nga mga kaso, 15 ang mga close contacts sa mga pasyenteng nagpositibo sa coronavirus, duha ang mga local authorized persons outside residence (Apor), duha ang mga persons deprived of liberty (PDLs), ug 11 ang mga local index nga mga kaso.
Sa 4,331 nga kinatibuk-ang kaso sa Covid-19 sa syudad, 434 ang mga returning overseas Filipino workers/locally stranded individuals (ROFs/LSIs) ug 3,897 ang mga local transmissions.
Ang Cagayan de Oro adunay 242 ka mga active cases, 75 niini na-admit sa Northern Mindanao Medical Center ug uban pang mga ospital sa syudad, 159 ang mga outpatients, ug walo ang mga ROFs/LSIs.
Nakatala usab og 11 ka mga Covid-positive nga mga kaso nga karon naka-recover. Anaa na karon sa 3,886 ang ihap sa mga nakarekober nga mga kaso sa dakbayan.
Sa maong numero, 303 ang mga LSIs, 121 ang mga ROFs, ug 3,462 ang mga lokal nga kaso (community: 2,936; Apors: 526).
Ang recovery rate sa Cagayan de Oro anaa na sa 89.72 percent.
Ang ihap sa mga namatay sa Covid-19 sa syudad naa sa 203.