Gipadayag ni Brgy. Ginebra Gin Kings coach Tim Cone nga uyon siya sa laing bubble set-up kon mao kini ang gikinahanglan aron masugdan lang ang 2021 season sa Philippine Basketball Association (PBA).
Ning puntoha, wala pa’y tino kon kanus-a masugdan ang bag-ong season sa PBA human gipaubos og balik ang Metro Manila ug kasikbitang mga probinsya sa Enhanced Community Quarantine (ECQ) sa sayong bahin ning buwana tungod sa pagsaka sa mga kaso sa COVID-19.
Sa orihinal nga plano, karon na untang Abril 18, 2021 sugdan ang bag-ong season apan nauswag kini sa wala pa matino nga petsa tungod sa mga panghitabo.
Ang PBA nigamit na og bubble set-up sa Clark, Pampanga sa miaging season ug giangkon ni Cone nga dili kini sayan alang sa tanang mga nangahilambigit.
Apan gipasabot ni Cone nga kinahanglan nilang moantos alang sa kaayuhan sa liga.
Hinuon giklaro ni Cone nga wala siya’y ideya kon aduna pa ba’y kapasidad ang PBA sa pagsubay og laing bubble set-up kon hisgutan ang pinansyal. (ESL)