Walay ipatuman nga lockdown sa Lungsod sa Santander, Cebu.
Kihi maoy giklaro ni Santander Mayor Marites Buscato subay sa hugonhugon sa mga barangay nga ipaubos sa paghugot ang lukop lungsod tungod sa umaabot nga pagsaulog sa ika-123 nga kapistahan sa patron niini nga si Sr. San Gabriel Arkanghel.
Bisan og way ipatuman nga lockdown, gihangyo ni Buscato ang mga residente sa lungsod sa istriktong pagsunod sa mga lagda kontra Covid-19.
Sama sa pagsul-ob og mask, face shield, kanunay nga pagpanghunaw o pag-disinfect ug physical distancing.
Niining paagi, dili na kinahanglan pa nga mopatuman sa hugot nga restrictions sa lungsod. “Ang akong dakong hangyo nga inyo kaming tabangan nga mga responsableng mga lumolupyo sa Lungsod sa Santander, nga ang atong kaluwasan sa Covid-19 virus ana gihapon sa atong mga kamot,” matod ni Buscato.
Tungod sa kagawasan nga gihatag gipasidan-an ni Buscato ang mga konstituwente niini nga mao nay moangkon sa responsibilidad sa risgo kon dunay imbitaron nga mga bisita gikan sa laing lungsod o syudad. (ANV)