Usa ka 37 anyos nga attendant sa usa ka pampublikong ospital sa Cebu City namatay sa Dominggo sa gabii, Abril 11, 2021 human atakeha sa hubak.
Apan ang iyang mga kabanay nibasol sa bakuna batok sa coronavirus disease 2019 (Covid-19) sa kamatayon ni Sydney Rose Panimdim, taga Barangay Tanke, Dakbayan sa Talisay, kay nagsugod ang paglain sa lawas niini niadtong Biyernes, Abril 9, human giingong nadapati sa ikaduhang dose sa bakuna.
Si Panimdim niuli gikan sa iyang trabaho niadtong Biyernes sa hapon ug nagmulo nga isog ang second dose sa bakuna.
Gipugngan una sa Superbalita Cebu ang ngan sa bakuna samtang nagpadayon pa ang pakisusi sa Department of Health (DOH) 7.
Si Dr. Mary Jean Loreche, tigpamaba sa DOH 7, niingon nga nagpadayon ang ilang pakisusi ug di angay nga mohukom lang dayon ang publiko nga ang bakuna ang namatyan ni Panimdim. (REV)