Ipadayon sa Cebu City Police Office (CCPO) ang checkpoint sa Transcentral Highway (TCH) human ilang nga epektibo ang presensya sa mga pulis sa bukid tungod kay magpahinay na sa pagpadagan ang mga motorista.
Matod ni Police Colonel Josefino Ligan hepe sa CCPO, nga matag weekend daghang mga motorista ang mosaka sa TCH aron didto magpakusog sa pagpadagan nga mao ba hinuoy hinungdan sa disgrasya.
Nakita ni Ligan nga malampuson ang kinalit nga checkpoint uban sa Cebu City Transportation Office ug Traffic Police Unit sa CCPO niadtong Sabado, Abril 10, 2021.
Nakadakop sila og 33 ka mga motorista, 18 ka motorsiklo ang gi-impound tungod sa kakuwang sa mga papeles sa ilang gimaneho ug wa usay lisensya ang driver.
“Ato ni ipadayon labinag kining ting adlaw nga long weekend nga naay holiday. Ipadayon nato ni ilabi nag Saturday and Sunday. Sayod ta nga ubay-ubay na gyud ang nadisgrasya dihang dapita. So, kining mga kiat og nawong nga mag drive diha way OR (official receipt) ug CR (certificate of registration) walay driver’s license, mapugngan nato nga madisgrasya sila,” matod ni Ligan.
Giplanohan ni Ligan nga magbutang na og regular nga patrol car sa TCH nga maoy mogukod niadtong mosobra sa gikusgon nga mga motorsiklo.
Nabantayan niya nga kon adunay presensya sa pulis sa TCH, mopahinay sa pagpadagan ang mga motorista.
Apan sa kasamtangan iya una nga tahasan ang Cebu City Mobile Force Company nga nagmontar og checkpoint sa Barangay Taptap aron mobadlong sa mga nagmotorsiklo nga kusog nga makapadagan.