SUPERBALITA CEBU

Misa di pampubliko; holiday sa Cebu City

Dili abli alang sa publiko ang holy mass isip pagsugat sa ika-500 ka tuig nga anibersaryo sa Unang Bunyag sa Kristiyanismo dinhi sa Dakbayan sa Sugbo karong Miyerkules, Abril 14, 2021.

Ang misa tambungan lang sa 700 ka mga tawo, 300 kanila mao ang mga dinapit nga public officials, mga opisyal sa lainlaing parokya samtang ang laing 400 mao ang mga sakop sa chorale, staff sa simbahan ug servers. Ang kalihukan maoy paghandom sa pagbunyag nila ni Portuguese explorer Ferdinand Magellan kang Rajah Humabon, hari sa Sugbo, ug iyang asawa.

Si Humabon gibunyagan sa ngan nga Don Carlo agi og pagtahod sa Espanya, Hari Carlos I samtang ang iyang asawa ginganlan og Rayna Juana, agi og pahinungod sa inahan sa hari sa Espanya.

Si Father Mhar Balili, secretary general sa Cebu 500 Year of Christianity, nagkanayon nga kadtong mga bisita nga dinapit gawas sa Sugbo, kinahanglang mopakita og negatibong RT-PCR test, 72 oras gikan sa ilang pagbiyahe.

Ang misa tambungan ug pangulohan ni Papal Nuncio to the Philippines Charles Brown, nga sugdan sa alas 4 sa hapon sa Abril 14.

Tambungan kini sa di mominos 10 ka mga obispo gikan sa lainlaing suok sa nasod.

Matod pa ni Fr. Aladdin Luzon sa Order of St. Augustine (OSA) nga way public masses nga ipahigayon sa Basilica Minore del Santo Nino sa maong adlaw.

Giabisohan ni Balili ang mga dinapit nga bisita nga dili moparada sa ilang mga service vehicle palibot sa City Hall square aron di makamugma og kahuot sa trapiko.

Ang Plaza Sugbu atubangan sa Cebu City Hall maoy magsilbing venue sa mga tawo nga motambong sa misa gikan sa sulod sa Basilica.

Ang mga sakyanan mahimong maka-park sa SM Seaside ug Robinsons Galleria Cebu sanglit aduna ray mga bus nga mohatod kanila gikan sa maong mga mall.

Ang Basilica adunay mga identification cards nga gihatag na ngadto sa mga dinapit.

HOLIDAY



Ang Abril 14 gideklarar usab sa Malacanang nga holiday.

Ang pagdeklarar ni Presidente Rodrigo Duterte nga way trabaho ug klase sa Dakbayan sa Sugbo sa mao nga adlaw maoy pagsanong sa hangyo sa Konseho sa Cebu City pinaagi sa resolusyon ni Konsehal Joel Garganera. Ang deklarasyon sa Malacanang gipetsahan og Abril 12, 2021.

COVID KALIKAYAN



Si Garganera, deputy chief implementer sa Cebu City Emergency Operations Center (EOC), nipasabot nga ang pagkontrolar sa gidaghanon sa makatambong sa misa gitumong aron malikayan ang pagtakod sa Sars-CoV-2, kagaw nga nagdala sa coronavirus disease 2019 (Covid-19).

“All those who are invited to attend are expected to comply the health protocol sa maong event. We’ve planned this together with the Archdiocese and the PNP, from transpo, traffic, engress/egress sa venue, seating arrangements, no ID’s no entry, perimeter block etc. All participants have kits, maps, instruction, do’s and don’ts,” nagkanayon si Garganera.

“This is to showcase to the world, that this 500 years celebration of Christianity will be done in manner that is strictly compliant of the health protocol,” dugang sa konsehal.

CARBON DI PASUDLAN



Para makontrolar ang bul-og sa mga tawo ug trapiko, ang Carbon public market dili una pasudlan og private vehicles, delivery trucks lapas alas 5 sa kadlawon sa Abril 14.

Si Lyntoni Alburo, officer-in-charge sa Cebu City Transportation Office (CCTO), nagkanayon nga mag-clearing sila sugod karong alas 5 sa hapon, Abril 13 sa merkado. Human sa ilang pag-clearing, kon adunay mga sakyanan nga moparada, ila kining isyuhan og citation tickets o i-clamp sama sa ilang sistema nga gibuhat niadtong Semana Santa.

VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph