Daling giatangan ang mga hulagway nga gikan ni Sen. Bong Go dihang gianunsyo nga di una magpakita si Presidente Rodrigo Duterte og moabot duha ka semana.
Kon ingon niini ang mahitabo sa miaging mga higayon, si Bong Go man dayon ang mo-rescue pinaagi sa mga hulagway nga nagpakita kon nag-unsa ang Presidente.
Tuod man, naay mga hulagway nga nanggawas. Kadtong diha sa sulod sa usa ka opisina nga nag-atubang silang duha. Naa sab kadtong mga hulagway nga si Digong naa sa dakong tugkaran sa Malakanyang nagpraktis og sakay sa iyang big bike.
Ang nakaapan lang kay naa diay mga ebidensiya nga wala matarong pag-edit ang maong mga hulagway. Mao nga usa ka photojournalist sa kaulohan nangayo kang Bong Go og mga orihinal nga kopya niini.
Pwede ra man, Senador, nga kuhaan og hulagway si Presidente Duterte og hulagway nga namirma. Kana bang moguwa nga busy siya ug wa lang magsigi og relaksrelaks.
Moguwa man gud nga mas kugihan pa diay si Bise Presidente Leni Robredo.
Apan ang dakong pangutana karon, asa man gyud diay si Presidente Duterte? Matod pa, wa may motug-an sa mga suod ni Digong diha sa Malakanyang.
Mao nga daghan kaayo ang naintriga. Unsa man gyud diay ang kahimtang sa Presidente? Tinuod ba ang istorya nga giataki kini?
Samtang daghan ang spekulasyon kabahin sa naunsa na si Presidente Duterte, nagkanayon si kanhi senador Sonny Trillanes nga di mosakay dayon niining drama nga mawala og kalit si Digong.
Matod pa sa kanhi senador, ikadaghan na man kini buhata sa Presidente. Kasagaran sa miagi, moguwa nga lig-on ra diay siya.
Alang kanako, mangayo na lang kita og tarong nga hulagway gikan kang Bong Go. Mas importante kini sa pagpakakaron. (DM @anol_cebu)