SUPERBALITA CEBU

Espinoza: Kuwang sa pagmintinar

Nagpakabana

Miubos na ang gidaghanon sa kaso sa mga natakboyan sa Covid-19 sa Dakbayan sa Sugbo ingon man sa mga silingan nga dakbayan. Atong ipadayon ang mga maayo nga pamaagi ug pagtuman sa mga lagda sa health protocols aron malikay ta sa Covid-19 ug dili na sad ta ma-lockdown sama sa Metro Manila ug silingan nga mga probinsya.

Ang datos sa Department of Health (DOH) Central Visayas niadtong Abril 11, 2021, miubos sa 912 gikan sa 1,016 ang aktibo nga kaso sa Covid-19 sa Dakbayan sa Sugbo. Ang Dakbayan sa Mandaue dunay 745 nga aktibo nga kaso sa Covid-19 samtang ang Dakbayan sa Lapu-Lapu dunay 882. Ang Probinsya sa Sugbo misaka sa 1,274 gikan sa 1,248.

Matod pa ni Cebu city Councilor Joel Garganera, ang Emergency Operations Center (EOC) deputy chief implementer, mas daghan ang namatay sa Covid-19 sa Marso 2021 kay sa niadtong Marso 2020. Ang datos sa EOC nagtala og 64 ka tawo namatay sa Marso 2021 sa Covid-19.

Akong gihatagan og pagtagad ang datos sa gidaghanon sa kaso sa Covid-19 ingon man sa gidaghanon sa mga namatay aron mahigmata kadtong mga tawo nga karon nagtuo lang gihapon nga bogus kining Covid-19. Matod pa, sa usa ka social media post (ambot nganong nakasulod unya gipasa-pasa pa gyud), nga gimugna ra kuno sa WHO ug DOH ang Covid-19. Susmaryosep! Maayo tingale nga ikiha ang nagpasiugda ani nga estorya aron masuta nga ang iyang pangisip maoy peke.

Atong paningkamutan nga magpadayon pagkunhod ang kaso sa Covid-19 aron magpadayon nga mahibalik ang atong ekonomiya aron ang dunay trabaho dili mohuwat sa ayuda sa pagkaon gikan sa atong kagamhanan. Karon, ang Metro Manila ug ang mga silingan nga probinsya, nga gi-lockdown, naproblema sa paghatag sa mga hinabang sa pagkaon ug tambal samtang ang hospital puno sa pasyente.

Dinhi sa atong probinsya ug sa mga dakbayan, atong pasalamatan ang mga tawo nga mituman na sa health protocols, bisan og duna pay dyutay nga mga gahi’g ulo, ug labina sa atong Labaw nga Makagaghum sa paghatag kanato og maayong panglawas.

* * *

Si Engr. Apolinar “Boie” Saso misuwat kanako agi og reaksyon sa akong lindog sa miaging semana kabahin sa underpass project diha sa Mambaling nga akong giingon nga makauuwaw sa administrasyon ni Presidente Duterte ug sa propesyon sa mga enhinyero. Matod ni Saso dunay upat ka “sum pumps” ang underpass apan kay napuno man sa hugaw wa motrabaho hinungdan sa baha kon mouwan.

Ang gipasabot ni Saso nga kuwang sa paglimpyo ug serbisyo sa bomba tungod kay di kalikayan nga mapuno sa hugaw ang suction sa bomba. Misugyot si Saso nga matag unom ka buwan limpyohan ang bomba ug ang makina sa bomba ug butangan og lawom nga kanal ang duha ka entrada sa underpass. Kon gimentinar o wala sa DPWH ang bomba, sila ra ang nakahibawo. Basi sa akong nahibaw-an, kadaghanan sa pasilidad sa goberno daling madaut kay kuwang sa pagmintinar.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!