Ang pag-inum-inom usa ka matang sa paglingaw-lingaw. Pawala sa stress ug ubang matang sa kakapoy sa lawas. Kini alang niadtong mga “responsableng” manginumay. Miingon ko nga “responsable” gumikan kay aduna may dili responsable. Kadto ning mga tawo nga kon mahubog, makutaw ang utok ug magmaoy. Mohimo og kagubot.
Ang pag-inum makamugna usab og mga higala ug amigo nga ikasuod. Family bonding. Tan-awa nang mga tawo nga hinginum, di ba daghan og higala. Kana lagi basta responsableng manginumay. Diha usab magkatapok sa inum ang mga paryente, higala ug sakop sa pamilya. Basta naay okasyon, naa ang inom.
Apan karon nga pandemiya, giimponer sa Dakbayan sa Sugbo ang liqour ban o gidili ang pagbaligya og ilimnon nga makahubog ug pag-inum labi na sa public places labi pa kadtong mag-inum-inum sa daplin sa kalsada nga usa ray baso. Diha magtinakdanay. Maka-inom man apan diha ra sulod sa balay. Mao nga si Mayor Edgardo Labella nangayo og gamay nga dispensa sa publiko nga basin sa sunod semana pa siya modesider kon iya na ba nga libkason ang liquor ban nunot ning nagkaubos nga kaso sa Covid-19. Dili lang ang mga manginumay ang naapektuhan sa liquor ban, apil usab ang mga tindahan, restaurants ug bars.
Nakadungog na man tingali kamo adtong estorya bahin sa usa ka ilaga nga gipainum og bino. Sa dihang nahubog na ang ilaga, misinggit kini ug nanghagit og sumbagay sa iring.
Matod pa bitaw ni George Bernard Shaw; “Alcohol is the anesthesia by which we endure the operation of life.” Dinhi sa Pilipinas dakong debate ang inum. Samtang adunay mangyam-id sa mga hinginum, ang mahiligon sa inum mokonsiderar sa pag-inum nga usa sa atong basic human rights.
Mao nga depende kon hain ka makapusta sa mga mahiligon ba sa inum o sa way hilig.
Ang kamatuoran magpabilin nga taliwala sa gidak-on sa atong giatubang nga mga suliran sa kinabuhi, iyahay kitag diskarte kon unsaon paglingkawas sa mga suliran. Samtang adunay uban magluhod-luhod sa pagpangayo og panabang sa Kahitas-an. Adunay uban modangop na lang sa pagsinggit: “Puslan man nga walay nagmahal, beerrrr pa, Day!”