Duna na usab untay moambak sa Mactan bridge niadtong Biyernes sa buntag, Abril 9, 2021, apan naluwas sa usa ka nagpakabanang van driver. Kon wa pa mapungi, hayan laing kinabuhi na usab unta ang makalas. Maayo gani kay abtik nga nakakab-ot ang van driver sa dalaga nga nagkumbitay na sa taytayan.
Dihang nagsunodsunod ang mga paghikog sa duha ka mga taytayan sa Mactan, gibutangan kini og kapulisan, inabagan sa mga barangay, ang duha ka mga habig, Mandaue ug Lapu-Lapu. Mao to nga napugngan ang pipila ka mga tawo nga nagtinguha sa pagpakamatay.
Apan panahon pa kadto ni General Debold Sinas dihang siya pa ang pangulo sa Police Regional Office (PRO) 7. Tingali sa mga nangpuli kaniya nga wa masayod sa kahimtang sa duha ka mga taytayan, wa na kini mahatagi og pagtagad. Human siya mabalhin, duna na man say mga tawo nga nangambak sa taytayan ug nangamatay.
Kon duna pay regular nga nagbantay sa duha ka mga taytayan, pulis ug tanod, mapugngan unta ang mga tinguha sa pagpakamatay. Importante nga dunay regular nga makabantay sa duha ka mga taytayan sa ingon way kinabuhi nga mausik.
Makasanta usab ang presensya sa kapulisan og mga krimen ug mga tawo nga dunay dautang plano sa estruktura. Apan basin bug-at tingali ang pagbantay sa taytayan kay nganong wa may klarong nagbantay. O mao gyud ni ang sakit sa Pinoy, ningas kugon ug reaksyonaryo. Kanang mohimo lang og lakang kon duna na nay mahitabo. Di ba pro-active ug preventive ang lakang. Kana bang gitumong aron mapugngan ug malikayan ang dautan ug di maayong hitabo.
Bisan tuod kon talagsa na lang ang nagsuway sa pagkutlo sa ilang kinabuhi sa duha ka mga taytayan, di maayong biyaan ang pisikal nga pagbantay kay magsalig na lang sa closed circuit television (CCTV) camera. Kon saligan ang camera, uwahi na kon dunay moambak kay layo pang latason.