SUPERBALITA CEBU

P15M danyos sa sunog sa pabrika sa lumber

Nikabat ngadto sa P15 milyones ang danyos sa sunog sa DTS Lumber, sa Zone 1 Jacinto Mayol St., Barangay Canduman, Mandaue City ala 1:19 sa kaadlawn sa Martes, Abril 13, 2021.

Matod ni Julito Dandan, machine operator ug stay-in sa manufacturing, nga nanagatulog sila niadtong panahona apan nakamata sila nga init na ug daghan na og aso.

Iyang gipukaw ang kauban niya nga stay-in ug nagdali dali na sila og gawas sa maong pabrika.

Sa pakighinabi sa Superbalita Cebu sa sekretarya sa maong pabrika nga si Lily Barbecho, adunay duha ka stay-in nga trabahante sulod sa pabrika ug tulo ka pamilya sa mga trabahante nga nagpuyo atubangan sa ilang pabrika, kinsang gipuy-an lakip sab sa nasunog.

Matod ni Barbecho nga sa iyang nahibaw-an ang silingan niya nga habal-habal driver ang nipukaw sa mga trabahante human nakita ang sunog sa iyang paglabay sa lugar.

Giadto siya sa mga stay-in nga trabahante sa ilang balay, sigon ni Barbecho.

Pag-abot niya sa pabrika dako na ang kayo.

Matod sa mga trabahante nga gikan sa opisina sa maong pabrika nagsugod ang sunog.

Ang mga pamilya sa mga trabahante nga nasunogan nagpaabot pa sa tag-iya kon asa na sila mopuyo.

Samtang nagpaabot, magbarongbarong lang una sila sa luna nga nasunogan.

Base sa storya sa mga trabahante nga nakadako ang sunog tungod kay dugay naabot ang mga bumbero.

Apan, sa pakighinabi sa Superbalita Cebu ni FO1 Denzel Espares, sa Mandaue City Fire Station nga mag-agad lang sila kon aduna silay tawag nga madawat.

Kon di dayon sila matawgan, di sab dayon siya makaresponde sa sunog.

"Di man mi magic nga kon naay sunog, naa dayon mi sa fire scene. Mag-agad ra pud mi ana nila kon manawag sila ug unsa sila oras manawag. So ingon ana nga time sad mi makaresponde," sigon ni Espares.

Nadawat sa MCFS ang alarma ala 1:19 sa kadlawn ug human ang upat ka minutos, gipasaka kini ngadto sa first alarm.

Gisaka nasab ngadto sa 2nd alarm ala 1:42 sa kadlawn ug nakontrolar ang sunog alas 2:40 sa kadlawn.

Human sa sobra sa duha ka oras nga overhauling ug pakigkumbati sa sunog, gideklarar dayon nga hingpit nga napawong alas 4:35 sa kadlawn.

Sa imbestigasyon nga nagsugod ang sunog sa opisina sa maong pabrika ug nikatap dayon ang kayo.

Sa pagkakaron, padayon pa ang imbestigasyon sa kambumberohan ug padayon pasad ang ilang pagkuha og mga ebidensya ug mga pamahayag sa mga witness, sigon ni Espares. (KFD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph