GIPALAMAN sa pan ang gituohang shabu nga gisulayan sa pagpalusot sa duha ka mga dalaw diha sa Misamis Oriental Provincial Jail (MOPJ) sa Gen. Luna Street ning siyudad sa Cagayan de Oro.
Sikop sila si Mark Julius (bansagon gitago), 18, ulitawo ug estudyante sa Grade 10 samtang ang kauban nag-edad og 17 anyos nga taga Manolo Fortich, Bukidnon.
Sa pakighinabi kang PMaj Zean Paul Cubil, hepe sa Police Station 2 (PS2) sa Cogon gibutyag nga gipaslak ang maong ilegal nga druga sa dalang pan nga ihatag sa ilang bisitahon.
Giingong dunay kanhi kasong pagkalambigit sa ilegal nga druga ug nasikop usab sa illegal possession of fire arms ang mga buot dalhan niini.
Samtang hugot usab nga gipanghimakak ni Mark Julius ang alegasiyon ug niingong igo lang nga gisugo sa kaila nga si "Kram" bugti sa P300.00 ug wala kini nasayod nga dunay kontrabando o ilegal nga druga sulod sa nahisgutang pan o sopas.
"Kung kabalo pa lang mi di namo isubo nag-eskwela biya ko, tagaan daw mi niya og kwarta, plete ra kay tagaan daw mi pagbalik," ang naghilak nga pahayag ni Mark.
Nakuha gikan sa posesyon sa suspek ang usa ka pakete sa gitoohang shabu nga gibanabanang anaa sa 0.09 gramo ug anaa sa P10,000.
Ang nahisgutang dinakpan ang anaa sa mini-cell sa PS2 ug ang menor de edad ang kasamtangang gidala sa hingtungdang ahensiya.