MATI CITY, Davao Oriental -- Malipayon ang 115 ka indibiduwal nga nailing mga displaced workers pinaagi sa Tupad program gumikan ilang nadawat ang cash subsidy nga gihatag sa gobyerno.
Niadtong Lunes, Abril 12, 2021, ang mga benepisyaryo nakadawat og tag P3,960 matag usa didto sa Public Employment Service Office (Peso).
Ang Tupad program ubos sa Department of Labor and Employment nga gidala sa Office of City Mayor pinaagi ni Mayor Michelle Nakpil Rabat kauban ang Peso.
Gibutyag sa Peso nga gikan sa mga barangay sa Mati City ang 115 ka mga benepisyaryo nga nakadawat og pinansyal nga subsidiya.
Sumala ni Emergency Employment Program focal person Janine Batucan nga kini nga hugna sa benepisyaryo kadaghanan kanila mga Imams gikan sa Muslim community sa dapit.
Karong adlawa, laing hugna na sab sa mga benepisyaryo gikan sa miyembro sa Sangguniang Kabataan sa Barangay Luban, Lanca ug Cabuaya ang makadawat og P6,000 matag usa uban sa dugang pagdalit gikan kang Mayor Michelle Rabat.
Mo-total sa P500,000 ang gigahin alang sa mga target beneficiaries nga giyahan sa buhatan sa Peso sa siyudad sa Mati. (PR)