DUHA ka menor de edad ang anaa karon sa kustodiya sa kapulisan sa Bunawan Police Station sa Davao City human ilang gipalamanan og shabu ug drug paraphernalia ang kan-on nga ilang dala sa ilang pagdalaw sa usa ka priso alas 3 sa hapon niadtong Lunes, Abril 12, 2021.
Sumala ni Bunawan police station commander Police Major Noel Villahermosa nga resulta kini sa hugot nila nga pagrikisa sa dala sa mga dalaw.
Una niini, natahap ang jailer dihang morag nakulbaan ang duha ka menor de edad nga nagpangedaron og 16 anyos ug 17 anyos sa pagpangutana sa pulis unsay sulod sa usa ka balunan nga alang sa usa ka priso.
Giukay sa pulis ang kan-on, ug didto nakita ang mga pakite sa gituohang shabu nga dunay street value nga P6,800, tooter, ug lighter.
Hugot karon nga giimbestigahan sa Bunawan police ang priso nga maoy gidalaw sa duha ka menor.
Gipailawom usab sa makuti nga interogasyon ang mga ginikanan sa duha ka menor labot sa hitabo.