Nakadesisyon si Mexican boxing great Juan Manuel Marquez nga mosulod sab sa pulitika sama sa gibuhat sa iyang kanhi higpit nga karibal nga si Manny Pacquiao, kinsa usa na ka senador sa Pilipinas.
Gianunsyo ni Marquez nga modagan siya isip kongresista sa Mexico ug nanumpa nga iyang i-knockout ang kurapsiyon.
Giangkon ni Marquez nga nadasig siya kang Pacquiao, kinsa nagsugod sab isip usa ka kongresista sa Sarangani Province una nahimong senador ug gituohan nga mahimong presidente sa Pilipinas sa ugma damlag.
Gipahibalo ni Marquez nga opisyal na siyang nisulod sa 2021 legislative elections alang sa Chamber of Deputies karong Hunyo 6 isip kandidato sa Mexico City borough sa Gustavo A. Madero.
Ang 47 anyos ug kanhi four-division world champion modagan ubos sa Ecological Green Party of Mexico ticket.
“I’m going to deliver a knockout to corruption,” matod ni Márquez sa usa ka press conference nga napatik www.boxingscene.com.
Matod ni Marquez nga gamiton niya ang paugnat sa kusog isip hiramenta sa iyang tinguha nga matabangan ang katawhan sa Gustavo A. Madero.
Matod ni Marquez nga kon nahimo ni Pacquiao ang pagserbisyo sa mga Pinoy pinaagi sa pulitika, iya sab kining mahimo ngadto sa iyang mga kababayan.
Nanghinaot si Marquez nga suportahan siya sa iyang bagang hut-ong sa mga sumosunod sa 21 niya ka mga tuig sa pagpamoksing.
Si Marquez miretiro sa boksing niadtong 2014 dala ang rekord nga 56-7-1, 40KOs. (ESL)