Balay-Balay, Tubig-Tubig: Sayop nga pagkasikop

Dear Atty. Joan,

Maayong adlaw, Atty. Joan ug sa uban pang mga manlalaban sa CLB.

Motampo ko og sulat sa inyong lindog mahitungod sa nahitabo sa among silingan nga mag-ama. Mangayo unta kog tambag kay naluoy gayod ko sa ilang nasinati.

Sa miaging buwan, gipasanginlan ang usa ka menor de edad nga bata nga nangawat sa pitaka sa among silingan. Dunay nahitabong panaglalis human giadto sa nurse ug iyang kapuyo ang balay sa bata. Didto nag-inatubangay ang amahan sa bata ug mga nang-akusar sa bata. Walay pitaka nga nakita ang mga reklamante sa maong panag-inatubangay

Natingala nalang mi nga pipila ka oras human nag-inatubangay sila, dunay mga pulis nga niabot sa balay sa bata. Gidakop ang bata uban ang iyang papa ug gidala sa police station.

Bisan pa man sa ilang pagpamatuod nga way gikawat sa maong reklamante, gipasakaan og kaso human gipasanginlan sa pagpangawat ang amahan.

Matod pa sa bata dihang nahinabi nako kini, pugos siya nga gipaangkon sa mga nag-interview nga polis nga gikawat niya ang pitaka. Gipasakitan sab daw nila ang maong bata.

Natinga sab ko nganong gidakop ang bata. Abi man nako nga ubos sa atong balaod dili mahimong madakpan ang mga menor de edad. Gani giipon sab ang bata ngadto sa mga adult detainees sa dihang gidala sila sa police station. Dili lang nako nganlan ang police station kay mahadlok sab ko sa akong seguridad.

Nakapyansa na ang amahan. Ang bata kay gi-refer sa kapolisan sa ilang barangay.

Problema sab karon sa amahan ang pag-atubang sa gihimo-himo nga sumbong batok kaniya. Dili man igo ilang panudlanan sa pagkuha og abogado.

Unsa kahay matambag nimo sa sitwasyon, Attorney? Hinaot unta nga matabangan nimo kami. Daghang Salamat!

Imong magtatampo,

Carina

Dear Carina,

Maayong adlaw usab kanimo diha, Carina, ug salamat sa imong pagsunod niining lindog.

Kon tinuod nga walay sala ang amahan nga gikiha, mahimo nila nga mapanubag ang kapolisan pinaagi sa pagpasaka og kasong “unlawful arrest” human gipangsikop ang mag-ama nga walay klarong hinungdan ug gipasakahan gihapon og kaso bisan pa man nga masuta nila kon gikawat nila ang pitaka sa silingan.

Laing kaso ang ilang atubangon sa paglapas sa Juvenile Justice and Welfare Act (JJWA) human nga gidirecho nga gisulod sa selda ang bata ug giipon pa gyod sa mga dagko nga piniriso. Gidili ang pagdakop dayon sa mga batang gipasanginlan nga nakalapas sa balaod.

Gani dili pagkapriso ang silot sa batang sad-an nga mahimo untang ipaubos sa mga intervention o diversion programs.

Gawas nga mahimo sila nga magpatabang sa Commission on Human Rights (CHR) sa pag-imbestigar sa di makaangayong buhat sa mga pulis ngadto sa mag-ama, magpatabang sila sa Public Attorney’s Office (PAO) aron mahatagan sila og legal assistance sa pag-atubang sa kaso ug pag-file og mga kaso batok sa pulis. Magdala lang sila og mga importanteng dokumento ug ebidensya pagpamatuod nga wa silay sala ug certificate of indigency gikan sa barangay.

Daghang salamat, Carina, sa imong sulat tampo ug hinaot nakahupay ang maong tambag sa naghoot mo karon nga galamhan.

Imong alagad,

Atty. Joan

[Lindog sinuwat ni Atty. Joan Saniel-Amit, executive director, inubanan sa mga abogado sa Children’s Legal Bureau sama nilang Atty. Jenny Vieve Cabradilla ug Atty. King Anthony Perez. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]

Related Stories

No stories found.
SunStar Publishing Inc.
www.sunstar.com.ph