PABAKUNA ko o dili?
Mao gyod ni ang kanunay nakapalibog sa akong panghuna-huna. Daghan ang moingon nga angay ko magpa-bakuna kay sigi kong lakaw sa gawas. Hapit kada adlaw na lang. Bisan asa ko maabot. Dapat lang, pa-bakuna ka, dugang pa sa akong anak ug asawa.
Apan kon mobasa o maminaw ka sa mga balita, labi na og aktibo pod ka sa social media, daghan pod ka og mahibaw-an nga mga makahadlok nga panghitabo nga dunay kalabotan sa bakuna batok sa Covid.
Usa na niini ang hilanat, paglabad sa ulo, blood clot, pangluya sa kalawasan, ug uban pa.
Duna pa gani namatay human gibakonahan.
Mao kini hinungdan nga misamot kalibog akong kutaw.
Unsay angay buhaton?
* * *
Personal gyod na nga desisyon kon magpa-bakuna ba o dili. Sayon lang kini mahitabo kay sa pagka-karon, mas daghan ang angay bakunahan kay sa gidaghanon sa bakuna.
Buot ipasabot, dili paigo ang bakuna sa tanang mga tawo. Mao kini hinungdan nga dunay gipili ang gobiyerno nga hut-ong sa katawhan nga angay maoy unhon sa bakuna sama sa mga health and medical frontliners.
Samtang gihimo pa ang pag-bakuna sa unang hut-ong, duna pay panahon sa paghuna-huna kon angay ba usab kita pabakuna kon moabot na ang atong turno.
* * *
Lisod gyod tuod ang paghatag sa desisyon.
Pero mao kini ang nahitabo.
Sa dihang bag-o pa lang nato nahibaw-an ang Covid, dihay mga video nga gikan man kuno to sa Wuhan, China nga mga tawo nga mokalit lang og kirig dayon hagba sa karsada, patay. Epekto kuno sa Covid.
Niadtong mga panahona, hilabihan ang kahadlok sa mga tawo, labi na sa dihang nakasulod na ang Ccovid sa atong nasod og misugod na kadaghan ang natakdan niini.
Labi na gyod kadtong mga panahon nga diha nay namatay sa mga lain-laing lugar.
Unsay atong giampo adtong mga panahona?
Mona-mona nato og ampo nga unta, makakita na og tambal batok niini. Gani, hangtod karon apil man kini sa atong giampo sa Oratio Imperata matag rosaryo nato kada adlaw.
Karon nga naa nay tambal, ngano nga mangita na man sab kita og rason nga di nato gamiton ang maong tambal?
Kon atong huna-hunaon ang matod pa mga side effects sa maong tambal, tanang tambal man seguro dunay side effect.
Kon atong unhon ang kaseguroan nga maayo gyod ta sa sakit, duna ba diay tambal nga 100% sure nga makaayo? Mao bitaw nay rason nga ubanan gyod nato sa pag-ampo ang pag-inom sa tambal aron mamaayo gyod ta sa atong sakit.
Unsa may diperensiya niining bakuna sa mga tambal nga atong gigamit karon nga pulos dunay mga “apan” pero gigamit lang gihapon nato?
* * *
Tungod niini, atong hunahunaon nga dili tanan mabakunahan. Kulang pa ang gidaghanon sa bakuna nga miabot sa nasod.
Gani, klase-klase ang miabot. Dunay gikan sa China, og duna sab gikan sa ubang nasod. Lain-lain sab ang “effectivity” sa maong mga bakuna. Dunay 50% lang, duna pod 90%.
Ngano man ni?
Tungod kay padayon pa ang pagtuon niini. Padayon pa usab ang paghimo sa mga trials.
Kon dili pabakuna, nagpasabot ba kini nga dili na matakdan sa sakit? Nagpasabot ba kini nga husto ang maong desisyon?