Atong pasalamatan ang mga opisyal sa Dakbayan sa Sugbo sa liderato ni Mayor Edgardo Labella ug ang nagdumala sa Emergency Operation Center (EOC) tungod sa ilang taho nga dakong kalamposan batok sa coronavirus disease 2010 (Covid-19) tungod sa pagtibugsok na sa kaso niini.
Dili ba makalipay ang taho sa EOC nga 21 nalang ka bag-ong kaso ang ilang natala gikan sa 434 ka indibiduwal ug 85% positivity rate kinsa gikuhaan og sample niadtong Abril 11, 2020. Sa kasamtangan, ang Cebu City, dunay 734 active Covid-19 cases kinsa padayon nga nagpaalim sa ilang balatian sa quarantine facilities, barangay isolation centers ug mga hotel.
Apan sa gihapon, dili kita mokompiyansa, sama sa panghinaut ni Konsehal Joel Garganera, deputy chairman sa EOC, nga mapadayon o mapaubsan pa sa Cebu City inubanan sa kooperasyon sa mga Sugbuanon ang gidaghanon sa kaso sa mosunod nga mga semana o buwan.
Ang Guadalupe nga adunay labing daghan og populasyon sa 80 ka barangay sa siyudad kinsa maoy adunay labing daghan og kaso sa nilabay nga 10 ka adlaw, karon 54 nalang ang ilang aktibong kaso. Gisundan kini sa Barangay Lahug (36), Basak San Nicolas (31), Tisa (26) Mabolo ug Talamban nga pulos adunay tag 24 ka kaso nga maoy naglangkob sa top 5 barangays.
Ang critical care occupancy rate sa Cebu City nga gilangkuban sa 15 ka private ug public hospitals anaa nalang sa 27.29% nga labing ubos human kini niabot sa critical level sa tungatungang bahin sa tuig 2020. Ang maong mga pasilidad nga adunay 1,013 beds para sa Covid patients, 276 nalang ang okupado ug adunay 737 nga bakante.
Sa gikaingon, dili kita mokompiyansa. Ang hulga sa virus napadayon, sama nga kita padayong mokooperar sa kagamhanan. Taliwala ning tanan, takus sa pagpasalamat ang mga lokal nga opisyal sa Dakbayan sa Sugbo tungod sa dakong kalamposan. Hinaut nga magpadayon na gyud kini sa bag-ong normal uban sa kinatibuk-an sa lalawigan.