Ang Cebu City Government ug National Historical Commission of the Philippines (NHCP) mipakita na sa publiko sa gibag-ong monumento ug marker ni Antonio Pigafetta, ang nag-document sa biyahe ni Ferdinand Magellan sa iyang pag-abot dinhi sa Sugbo niadtong 1521, nga naa sa Plaza Independencia.
Si Dr. Rene Escalante, chairman sa NHCP, maoy nitugyan sa marker ngadto sa Cebu City government nga gidawat ni Mayor Edgardo Labella.
Si Labella nihulagway nga dako og gihuptan nga papel si Pigafetta, usa ka Italiano, nga maoy nagsulat sa mga gibuhat ni Magellan dinhi sa Sugbo.
Ang mayor nagkanayon nga kon wala pa si Pigafetta, posible nga dili mahisama ka inpluwensiyado ang Romano Katoliko dinhi sa Pilipinas sanglit 86 porsyento sa mga Filipino mga Kristiyano.
Si Labella nagkanayon 140 ka tuig sa wala pa moabot si Magellan dinhi sa Pilipinas, naa na si Rajah Sulayman sa Manila nga usa ka Muslim apan wa makapanakod sa mayoriya sa mga Pinoy.
Matod sa mayor nga gumikan sa mga sinuwat ni Pigafetta nga gisunod usab sa mga Filipino nga historian, dako kini og gikatabang sa pagpakatap sa Kristiyanismo diin si Rajah Humabon ug Queen Juana ang unang gibunyagan sa pag-abot ni Magellan niadtong Abril 14,1521.
Ang mayor ug si Consul Francisco Guidicelli sa Consulate of Italy dinhi sa Sugbo nihulagway nga ang marker ug monumento ni Pigafetta maoy maghatag og dugang kalig-on sa relasyon sa Cebu ug Italy. (PAC)