Laing mga luna ug properties nga gipanag-iya sa Kagamhanan sa Lalawigan sa Sugbo gibawi sa Probinsya.
Kini maoy gipahibaw sa kagamhanan human sa pagsusi ni Cebu Gov. Gwendolyn Garcia sa mga luna nga kaniadto gihatag sa miaging administrasyon apan wala maaprubahi sa Commission on Audit (COA).
Usa na niini ang 679 metro kwadrado nga luna nga nahimutang sa Gorordo Avenue sa Dakbayan sa Sugbo nga mobalor og P88.3 milyones o P130,000 matag metro kwadrado.
Ang maong luna gidonar ngadto sa Criminal Investigation and Detection Group (CIDG) 7 niadtong Agusto 2018.
“We will do the proper documentation on the basis of the COA observation nga walang prior COA approval. This deed of donation needs to be revoked and enter into a deed of usufruct with CIDG for another piece of property that you and the real estate (Provincial Capitol) decide upon in the designated government center,” matod ni Garcia pinaagi sa Sugbo News.
Atol sa pakigtagbo sa gobernador ni CIDG 7 Director Edwin Dayag, iya kining gitanyagan og luna sa Sudlon, Lahug sa Dakbayan sa Sugbo nga gipanag-iya sa Probinsya nga giisip nga “government center”. Ang kasabotan ubos gihapon sa usufruct.
“...That should have never been donated. In fact, it can even be grounds for complaint with the Ombudsman on the grounds that it is grossly disadvantageous to the Province of Cebu. Why that property should be given when we still have available lots in the designated government center?,” dugang pasabot ni Garcia.
Sa samang rason, nitanyag usab si Garcia og luna alang sa Highway Patrol Group (HPG-7) sa “government center.”
Kuwang usab ang dokumento nga magpamatuod nga gi-aprubahan sa COA ang deed of donation.
Gawas kanila, nakigtagbo usab si Garcia sa mga sakop sa Regional Internal Affairs Service (RIAS) 7 ug Bureau of Treasury (BOT) 7 sa tinguha nga amendahan ang kaniadtong usufruct agreement sulod sa 50 ka tuig.
Apan niadtong Abril 12, gi-aprubahan sa Hunta Probinsyal ang resolusyon nga gi-pangamahanan ni Bokal John Ismael Borgonia nga nag amendar sa maong kasabutan.
Gikan sa 50 ka tuig nga kasabotan, gipaubsan ngadto sa 25 ka tuig, apan renewable ang kontrata alang sa laing 25 na usab ka tuig.
Tinguha ni RIAS 7 Director Rex Urbano nga mahatagan usab sila og luna sa government center sanglit nahan-ay na usab ang ilang pundo alang sa pagpabarug og kaugalingong buhatan.
Sa pag balik ni Garcia sa 2019, gi-sugdan niini ang pag recover sa mga properties sa Salinas Drive ug Governor M. Cuenco Ave. sa Cebu IT Park nga iya sa Probinsya.
Lakip usab ang 29.7 hektaryang luna sa Sta. Fe, isla sa Bantayan kon asa nahimutang ang Bantayan Island Airport. (ANV)