SUPERBALITA CEBU

DOH mo-imbestigar

Padayon pa ang imbestigasyon sa Department of Health (DOH) 7 sa kamatayon ni Sydney Rose Panimdim, trabahante sa usa ka publikong hospital diin namatay pila ka adlaw human nabakunahan.

Sa habig sa pamilya ni Panimdim, base sa report sa GMA7 Balitang Bisdak nga dili na murekalmo ang ilang pamilya sa kamatayon ni Panimdim aron makapahuway na ang kalag niini.

Sa maong interview miingon si Zenaida Panimdim, ang inahan ni Sydney nga posible nga wala miingon si Sydney nga hubakon siya niadtong tungod naayo kini human niya gipakatawo ang iyang ikaduhang anak.

GISUSI PA

Samtang, si Dr. Mary Jean Loreche, tipamaba sa DOH 7 miingon sa Superbalita Cebu nga padayon pa nilang gisusi sa medical records ni Sydney kung ang hinungdan ba sa iyang kamatayon tungod sa adverse effects sa bakuna.

Wala pa sab nila nasuta kung unsa nga matang bakuna ang giturok kang Sydney apan base sa record nga Sinovac lang ang ilang gipadala nga doses ngadto sa hospital diin magtrabaho si Sydney.

Matod ni Loreche nga kinahanglan gyud nila ang medical records una sila mohatag og conclusion ug dili base sa pangankon sa pamilya sa namatay.

Giklaro ni Loreche sa Superbalita Cebu nga ang mga person with comorbidities o kadtong adunay mga kondisyon sa lawas, luwas ra nga makapabakuna kung maayo ang iyang kondisyon niadtong panahon nga gibakunahan siya.

Gani, wala sab nagbawal ang DOH 7 ug bisan unsang mga kalihokan human nga mabakunahan ang usa ka tawo.

Sigon ni Loreche nga ang bakuna dili maka-apekto sa regular nga gimbuhaton sa usa ka tawo ang importante lang nga ma-monitor ang ilang kondisyon sud 30 minutos ngadto na sa usa ka oras human sila nabakunahan.

WA I-LOCKDOWN

Sa laing pakighinabi, sigon ni Nelso Cabanes kapitan sa Barangay Tangke, Talisay City nga wala nila gipa-ubos sa lockdown ang panimalay nilang Sydney tungod wala kini nagpositibo sa Covid-19.

Gani sa report sa Balitang Bisdak nga si Sydney usa lang ka suspected lang sa Covid-19.

Wala na gihaya si Sydney ug sigon ni Cabanes nga gilubong ra kini og diretso.

Nasayran nga base sa alegasyon sa pamilya ni Sydney nga niadtong March nabakunahan sa unang dose si Sydney og nakabati kini og adverse effects apan na-ulian ra dayon.

Apan, sa pagdawat niya sa ikaduhang dose niadtong Abril 9 giingong mitug-an si Sydney sa iyang pamilya nga mas isog kini itandi sa unang dose.

Niadtong Abril 10, nitrabaho pa kini apan nihangyo nga mo-undertime tungod naglain ang iyang lawas ug giingong nakasinati og paglisod og ginhawa o asthmatic attacks.

Gidala kini sa Talisay District Hospital apan nakabsan si Sydney sa iyang kinabuhi.

LAING CASUALTY?

Sa laing bahin, adunay nadawat nga taho ang Superbalita Cebu nga adunay laing gituohang namatay human kini nabakunahan sa Covid-19 vaccine, usa ka opsiyal sa pribadong hospital sa syudad sa Sugbo.

Apan, matod ni Loreche nga wala silay nadawat nga pormal nga taho gikan sa pasilidad diin nabakunahan ang maong opisyal.

Sigon niya nga kinahanglan nila kining maong taho una sila makapadayon sa pag-imbestigar kon ang gikamatyan sa maong opisyal adunay kalabutan sa bakuna.

Mipasalig si Loreche sa publiko nga adunay pre-screening nga mahitabo sa dili pa magpabakuna kini aron masuta kung maayo ra ba ang kondisyon sa lawas sa magpabakuna.

Sigon niya kadtong adunay gipamati kinahanglan sab sila magpahibawo ngadto sa doctor aron masusi nila og maayo kon mamahimo ba silang bakunahan.

Matod ni Loreche nga wala ray angay ikabalaka sa bakuna tungod luwas ug epektibo kini.

Gani, usa kini sa epektibo nga solusyon batok sa pandemya gawas sa pagsunod sa minimum health standard. / KFD


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph