BARANGAY konsehal lakip sa pito ka mga tawo nga nadakpan samtang nagtikbakay sa Purok Kapayas, Barangay Busay, Pinamungajan, Sugbo sa Martes sa alas 3:30 sa hapon, Abril 13, 2021.
Ang konsehal giila ni Police Major Vincent Zozobrado, hepe sa Pinamungajan police, nga si Romulo Balbero Laraga, 55, nagpuyo sa dapit.
Samtang ang ubang nangadakpan giilang sila si Erenio Atil Quijano, 36, minyo, taga Brgy. Tangub; Froilan Redilla Orillano, 43, minyo; Dionisio Canoy Nemenzo, 38 , minyo, construction worker, taga Brgy. Busay; Virgilio Balambao Talavera, 35,ulitawo, taga Brgy. Guizo, Mandaue City; Jenny Dalis Talavera, 24, dunay kapuyo, taga Brgy. Vito, Minglanilla ug Caasar Bacalso Cabonilas, 51, minyo.
Matod ni Zozobrado nga dunay concerned citizen nga nitaho kanila kalabot sa tigbakay.
Uban sa 2nd Provincial Mobile Force Company intelligence operative pinangulohan ni Police Corporal Kay Pulmano, ilang gipahigayon ang operasyon.
Ilang naabtan ang mga tawo nga nagtigbakay atol sa kapistahan sa lugar.
Matod ni Zozobrado nga ilang nasayran nga si Laraga ang nagpasiugda sa tigbakay.
Ilang nasakmit ang duha ka mga manok igtatari, usa niini patay na. Apil sa nakuha ang tari ug pusta nga P470.
Kasong kalapasan sa Presidential Decree (PD) 1602 kun anti-illegal gambling ang ipasaka batok sa pito nga gidala sa police station. (GPL)