TAGUM CITY, Davao Del Norte -- Tulo ka mga “wanggits” kon edaran ang gidakop sa mga pulis didto sa Tagum City Overland Transport Integrated Terminal alas 2:30 sa hapon niadtong Martes kay pinangita sila sa balaud.
Gidakop mao sila Loreto Javier Hanaya, 68 anyos; Hermillo Ladroma Sr., 66 anyos, minyo, mag-uuma; ug Ediol Piad, 68 anyos, usa ka driver sa lungsod sa San Isidro.
Subay sa report, ang mga nahisgutan gisikop pinaagi sa mga personahe sa 1st Davao Norte Provincial Mobile Force Company (1st DNPMFC), Tagum City Police Station ug San Isidro Municipal Police Station atol sa gilusad nga Manhunt Charlie operation sa maong dapit.
Ang pagdakop sa mga suspek subay sa warrant of arrest nga giisyo ni Judge Gemma Gamala Betonio sa Municipal Trial Court sa Asuncion, Davao Del Norte nanukad sa kasong paglapas sa Presidential Decree (PD) 1602 kon Anti-illegal Gambling Law nga dunay criminal case number 2405-21, nakapetsa Marso 23, 2021.
Balor P30 mil matag usa kanila ang girekomendang piyansa sa korte alang sa ilang temporaryong kagawasan.
Ang maong mga dinakpan gikustodiya na sa Tagum City Police Station samtang gipaabot ang sunod mando sa korte kanila. (Dexter T. Visitacion)