TRABAHO ug personal nga bangi ang nag-unang gitan-aw karon sa kapulisan nga anggulo sa pagpusil-patay sa usa ka security guard Martes sa hapon, Abril 13, didto sa Malinawon, La Filipina, Tagum City.
Nailhan ang biktima nga si Rexer Bareda, 21 anyos, taga Banaybanay, Davao Oriental.
Nasayran nga nagmaneho ang biktima sa iyang motorsiklo kinsa padung na unta kini mo-deposito sa iyang isyu nga armas.
Giingon nga samtang nagdagan ang motor sa biktima, gitaparan sab kini sa riding-in-tandem, kinsa ang angkas sa naka-motor nga usa ka babaye maoy mipusil.
Naintimano ang biktima, hinungdan nga nahagba kini sa sagbutan kilid sa kalsada samtang dali sab nga mikagiw ang mamumuno.
Nagpadayon pa ang kapulisan sa pagsuta sa dugang motibo sa kremin aron magamit nila diha sa ilang imbestigasyon.