Gipangmakmak sa Los Angeles teams, Utah Jazz ug Nets ang ilang tagsatagsa ka mga kontra niining naghinapos nga elimonation round sa National Basketball Association (NBA)
Gumikan sa padayon nga pagpahuway ni LeBron James ug Anthony Davis, si Kyle Kuzma ang nitimon sa Lakers aron pakamangon ang Charlotte Hornets 101-93.
Siya nibahog og 24 puntos samtang niamot og 19 puntos si Dennis Shrodder ug 12 rebounds ang giabag ni Andre Drummond diin ang Lakers, 4-3 win-lose record atol sa ilang pagpanulong.
Si Devonte Graham maoy nangulo sa pilderong Hornets pinaagi sa iyang 19 puntos ug niamot og 17 puntos ug 10 rebounds si Caleb Martin.
Ang laing LA team nga mao ang Clippers, padayon nga nagmangtaa ubos sa pagpangulo ni Paul George.
Si George nipabuto og 36 puntos aron pangulohan ang iyang team batok sa Indiana Pacers 126-115.
Ang Clippers kaunom na nidaog nga sagunson diin upat na ka duwa diin si George nipuntos og 30 pataas.
“That’s what we’ve got to do, It’s just how we’ve got to play. That’s just how we’ve got to finish.” padayag ni George.
Gipakamang sab sa Utah Jazz ang Oklahoma City Thunder 106-96 aron hugtan ang ilang bakos para magpabilin nga top seed sa West.
Si Bojan Bogdanovic nirehistro og 23 puntos samtang si Donovan Mitchell nidugang og 22 para sa Jazz kinsa padayon nga niduwa nga wala si Jordan Clarkson gumikan sa injury sa tuhod.
Ang OKC gipangulohan sa ilang batan-on nga player nga si Luguentz Dort kinsa nirehistro sa iyang career high 42 points ug giabagan ni Moses Brown sa iyang 12 puntos ug 15 rebounds.
Samtang gipangulohan ni Kevin Durant ang Brooklyn Nets batok sa Minnesota Timberwolves 127-97.
Si Durant nipaarak og 31 puntos samtang 23 kang Joe Harris samtang wala pa makaduwa si Kyrie Irving ug James Harden.
Ang Phoenix Suns nidaog sab batok sa Miami Heat 106-86 ug gipatapsingan sa Boston Celtics ang Portlan Trail Blazers 116-115 ug gikuniskunis sa Atlanta Hawks ang Toronto Raptors, 108-103. (PAC)