Sa mosunod nga tulo ka buwan, takdo na nga duha ka tuig si Senator Manny Pacquiao nga wala na makaaway ibabaw sa boxing ring.
Apan taliwa niini ug sa nihamok nga pandemya, ang nag-inusara nga 8th time division world champion nga si Pacquiao, padayon kining nagpakondisyon.
Ang gihugonhugon nva molansar pagka-presidente sa nasod nga taga General Santos City nagsugod na sa iyang mga ensayo didto sa iyang mansion sa Mindanao.
Bisan sa iyang ka-busy pag-atiman sa iyang obligasyon isip senador, si PacMan kanunay nga maggahin og oras para sa iyang training didto sa Manila uban sa iyang entourage.
Sa niaging mga buwan, sibaw kaayo ang mga balita nga karong buwan sa Hunyo o Hulyo, mobalik og away ang Pambansang Kamao didto sa Middle East.
Apan niining bag-o, base sa mga reports nga dili pa sigurado ang tanan sanglit wala pa matino ang venue, petsa sa away ug si kinsa ang posible nga makontra ni Pacquiao.
Gumikan niini, subayon og balik sa mga opisyal nga nagpalibot ni PacMan aron makamugna sila og kontrata para maklaro na ang pagbalik niya og away sa ring.
Katapusang nakigsumbagay ang senador niadto pang Hulyo 2019 diin iyang gikulating ang hambugero nga Amerikano nga si Kieth Thurman didto sa Las Vegas.
Si Pacquiao aduna untay gikatakda nga away niadtong 2020 apan nadiskaril kini gumikan sa presensiya sa Covid-19 diin apektado ang tanang sports.
Ang 8th time division world champion adunay buhi nga kontrata uban sa Paradigm Sports Management nga nagbase sa Los Angeles diin siya usa ka talent.
Posible usab nga mo-intra ang Premier Boxing Champions ni Al Haymon kinsa maoy nag-promote kang Pacquiao batok ni Adrien Broner ug ni Thurman.
Nag-una sa mga pilianan sa Pinoy super hero nga si Pacquiao mao silang Terrence Crawford, Mikey Garcia ug Errol Spence Jr kinsa maoy mga bug-at nga pangalan sa welterweight division. (PAC)