JOJIE E. OGA-OB
Barili, Cebu
Ang langgam nga ania sulod kanako gikapoy na.
Dili na siya makahimo paglupad sa halayo.
Bali na ang iyang mga pako, basa ang mga balhibo
Morag piso nga gipuko ug naminsok sa ulan.
Dili ko mahimo ang pagpadayon sa akong panaw
Kon wala ang iyang naandang awit
Nga molagingling sulod sa akong kahiladman
Nga maoy mopatulin sa akong paglupad
Ngadto sa gipadulngan kong unahan.
Apan wala na. Wala na. Wala na.
Ang langgam nga ania sulod kanako
Luya na ug dili na makalupad sa halayo.