CHITO E. GERMINO
Paknaan, Mandaue City, Cebu
Sa panahon ni Elijah dunay hataas kaayo nga hulaw. Naughan ang tubod nga gisaligan niya. Unya ang Diyos misulti kang Elijah, “Karon, lakaw ngadto sa lungsod sa Zarepat duol sa Sidon. May biyuda nga nagpuyo didto nga gisugo nako sa pagpakaon nimo.”
Miadto si Elijah sa Zarepat ug sa pag-abot niya sa entrada sa lungsod may nakita siyang usa ka biyuda nga nangahoy.
“Palihog hatagi kog tubig nga mainom,” ni Elijah ngadto sa babaye nga iyang giduol. Samtang nagkuha og tubig ang babaye midugang si Elijah pag-ingon, “Ug palihog dad-i kog pan.” Mitubag ang biyuda, “Sa ngalan sa buhing Diyos nga imong Diyos, nanumpa ko nga wa koy pan. Ang anaa ra gyud usa ka hakop harina sa panaksan ug diyutay nga mantika sa oliba sulod sa tibod. Niari ko aron mangahoy aron inig-uli nako duna koy ikadigamo alang sa akong anak lalake ug kanako. Mao ni among katapusang pagkaon, unya mamatay na mi sa kagutom.”
“Ayaw kabalaka,” ni Elijah. “Lakaw ug pagluto og pagkaon. Apan unaha pagkuha ang gamayng pudyot ug ihatag kanako. Inig kahuman magdigamo ka sa nahabilin para nimo ug sa imong anak. Kay mao kini ang gisulti sa Diyos sa Israel, ‘Ang panaksan di mahutdan og harina ug ang tibod di mahutdan og mantika sa di pa moabot ang adlaw kanus-a Ako, ang Diyos, mopaulan.’”
Gituman sa biyuda ang gisulti ni Elijah ug silang tanan adunay igong pagkaon sulod sa daghang mga adlaw. Sumala sa saad sa Diyos pinaagi kang Elijah, ang panaksan wa gyud mahutdi og harina ug ang tibod wa gyud mahutdi og mantika.
Paglabay sa pipila ka adlaw nasakit ang anak sa biyuda. Migrabe ang sakit niini hangtod nga namatay.
Mireklamo ang biyuda kang Elijah, “Tawo sa Diyos, nganong gibuhat kini nimo kanako? Mianhi ka ba aron pagpahinumdom sa Diyos sa akong mga sala nga nimugna sa kamatayon sa akong anak?”
“Dad-a kanako ang bata,” ni Elijah.
Gikuha ni Elijah ang bata gikan sa mga kamot sa biyuda ug gidala sa itaas sa balay, sa lawak niyang katulganan. Gipahiluna niya ang bata sa katre. Unya kusog ang tingog ni Elijah nga nag-ampo, “O, Diyos ko, nganong gibuhat man Nimo sa biyuda kining usa ka terible nga butang? Maayo siya nga miatiman nako, unya gipatay Nimo ang iyang anak!”
Tulo ka higayon nga midupa si Elijah ibabaw sa lawas sa bata ug nag-ampo, “O, Diyos ko, ibalik ang kinabuhi sa bata!”
Gitubag sa Diyos ang pag-ampo ni Elijah. Misugod pagginhawa ang bata ug naulian sa kinabuhi. Gidala niya ang bata sa silong ug gibalik sa iyang inahan.
“Tan-awa, buhi ang imong anak!” ni Elijah.
“Karon nasayod na ko nga tawo ka sa Diyos ug ang Ginuo makasulti pinaagi kanimo!” matod sa babaye.
Malipayon na ang biyuda kay nabuhi ang iyang anak. Nagpadayon siya pag-atiman kang Elijah hangtod nga miabot ang ting-ulan.
(KATAPUSAN)