Di kalikayan nga nasudlan na og pulitika ang planong pag-ugmad o pag-develop sa Carbon Public Market. Ang kagamhanan sa Dakbayan sa Sugbo nakig-alyado sa Megawide Construction Corp. sa pag-develop sa century-old nga Carbon Market ngadto sa world class nga merkado. Gastuhan kini sa Megawide og P5.5 bilyones. Ang kontrata 50 ka tuig ug puwede pa lugwayan og laing 25 ka tuig.
Ang importanteng mga probisyon sa joint venture agreement (JVA) o kasabutan tali sa kagamhanan sa Dakbayan ug Megawide mao nga mohatag ang kompaniya og tag P50 milyones sa City Government matag tuig sa unang lima ka tuig. Mo-increase o patong nga 10 porsiyento nga kitaon sa Carbon sa mosunod nga katuigan hangtod mapupos ang kontrata. Inig tapos sa kontrata, ang bisan unsang gipabarug nga estraktura maiya na sa Dakbayan.
Ang tanang kabalaka sa mga nanginabuhi sa Carbon natubag na sa JVA. Apil na niini ang abangan sa stalls, presyo sa mga palaliton ug modumala sa operasyon. Ang Megawide dili makabuot-buot sa rate sa rental kay ang Cebu City Government gihapon ang magbuot niini pinaagi sa Market Authority Division ug City Council. Ang tanang vendors nga anaa karon nag-negosyo, ma-accommodate o maka-angkon gihapon og stalls sa bag-ong Carbon. Ang mga lumolupyo sa Bato, Ermita nga maapektuhan sa development i-relocate.
Dakong bentaha sa Kagamhanan sa Dakbayan ang kasabutan. Ang kinatibuk-ang market operations karon, mokita lang og P106 milyones matag tuig apil na niini ang Taboan, Pasil Fish Port, Pardo Market, T. Padilla ug Ramos Public Market ug 40 per cent ang kita ani gikan sa Carbon Unit 1,2 ug 3. Kuhaan pa sa operating expenses nga P40 o P50 milyones kada tuig.
Apan gumikan lagi sa pulitika, nalawgaw ang kasabutan. Ang mga sakop sa oposisyon, Bando Osmena Pundok Kauswagan (BOPK) supak sa kasabutan kay disbentaha lagi kuno sa kagamhanan. Bisan si Bise Mayor Mike Rama nga kaalyado unta supak kay matandog ang mga heritage sama sa Compania Maritima Building ug Freedom Park nga tipik ug kabahin na sa kasaysayan sa Sugbo. Unsa man, dili na lang ta mo-develop kay naay matandog nga kabilin o heritage?