Gipahimangnoan sa City Traffic Management System (CTMS) sa Dakbayan sa Lapu-Lapu ang mga tricycle drayber sa Angasil wharf sa Barangay Mactan nga dili magpamahal sa ilang plitehan sa mga pasahero.
Kini human masuta nga inay ang naandang P15 nga pletihan gikan sa eskina sa Mactan Newtown, nangayo na sila karon og P20.
Nakompirmar ang pagpamahal sa plite sa mga tricycle drayber sa pangulo sa CTMS nga si Mario Napule, kinsa personal nga misusi sa dapit human gimandoan ni Lapu-Lapu City Mayor Junard Chan.
Si Chan nakadawat og reklamo kalabot sa pagpamahal sa pletihan sa mga tricycle drayber sa iyang FB page.
Matod ni Napule nga ang mga tricycle drayber miangkon atol sa iyang pakisusi nga dugay ra sila nga nangayo og P20 nga pleti sa mga pasahero sukad miigo ang pandemya.
Apan gipasabot niya nga dako kining kalapasan sa lagda sa pletihan sa dakbayan sanglit P15 lang ang nalatid sa resolusyon nga giaprobahan sa konseho sa dakbayan sa miaging tuig diin miagi pa og public hearing.
Gawas sa pagpangayo og mahal nga pletihan, nasuta usab ni Napule nga adunay mga tricycle drayber nga mosobra usab sa gitugot nga kapasidad sa pasahero butang nga dako gihapong supak sa lagda sa kagamhanan.
Nipasalig ang mga drayber nga mosunod sa nalatid nga pletihan ug mag-obserbar sa insaktong kapasidad sa pasahero human gipahimangnoan ni Napule.
“Ako silang giingnan nga og dili mo mosunod sa unsay nasabotan ug naa gihapon mi madawat nga reklamo, pangdakpon ta mo ug isyuhan ta mo og overcharging unya kanang uban ngara wala raba nay prangkisa, mga colorum, ma impound gyud na ilang mga tricycle,” matod ni Napule. (GCM)