8 nasikop sa tigbakay

Konsehal nasikop uban sa lain pang unom ka sugarol atol sa tigbakay niadtong Martes, Abril 13, sa alas 3:30 sa hapon sa Purok Kapayas, Brgy. Busay, Lungsod sa Pinamungajan.

Si Romulo Balbero Laraga, 55, minyo, konsehal sa Brgy. Busay, Pinamungajan, napusasan.

Lakip sa gipangpusasan mao sila si Erenio Atil Quijano, 36, minyo, taga Brgy. Tangub, Pinamungajan; Froilan Redilla Orillano, 43, minyo, taga Brgy. Busay, Pinamungajan; Dionisio Canoy Nemenzo, 3, taga Brgy. Busay, Pinamungajan; Virgilio Balambao Talavera, 35, ulitawo, taga Brgy. Guiso, Dakbayan sa Mandaue; Jenny Dalis Talavera, 24, taga Brgy. Vito, lungsod sa Minglanilla; ug Caesar Bacalso Cabonilas, 51, taga Brgy. Busay, Pinamungajan.

Si Major Vincent Zozobrado, hepe sa Pinamungajan Police Station nga nahinabi sa Superbalita Cebu, nagkanayon nga si Laraga maoy nagpasiugda sa tigbakay.

Matod pa ni Zozobrado nga nakadawat sila og report gikan sa concerned citizen nga dunay mga nagsugal sa tigbakayan sa maong dapit. Wala sila maglangay, uban nila ni Zozobrado, ug sa iyang tropa, ang mga sakop sa 1st Manuever Platoon, 2nd PMFC Intel Operative ngaa si PCpl. Kay Pulmano, gisuhid ang hilit nga lugar.

Nagkatibuwaag sa pagpanagan mga nanugal. Pero si Laraga nadakpan uban sa laing unom.

“Lingawlingaw daw nila kay for fiesta. Among gipangpusasan sila si Konsehal kay di ni rason, illegal ang tigbakay, unya pandemic sab kuyaw kaayo sa virus,” matod ni Zozobrado.

Gipadayag niini nga magsilbing warning sa mga sugarol sa Pinamungajan ang pagkasikop sa maong barangay opisyal.

Si Laraga ug mga kauban pasakaag kasong kalapasan sa PD 1602 o pagpanugal og manok igtatari. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph