Gitagaan og pasidungog ni Lapu-Lapu City Mayor Junard Chan ang drayber sa van nga misanta sa misuway og ambak nga 23-anyos nga babaye sa Mandaue-Mactan Bridge niadtong Biyernes, Abril 9.
Ang drayber nailhang si Ritchie Arnado, taga Deca 4, Brgy. Bankal, Dakbayan sa Lapu-Lapu.
Si Arnado way duhaduha nga mikanaog sa iyang gimanehong van dihang miagi sa Mandaue-Mactan Bridge human makamatikod sa usa ka babaye nga nisuway og layat sa taytayan.
Tungod sa iyang nabuhat, nakadesisyon si Chan sa pagpasidungog kaniya sanglit iya kining giisip nga modern day hero.
Naatol usab ang pagluwas ni Arnado sa babaye sa pagsaulog sa Araw ng Kagitingan.
“Ikaw ang tinuod anak ni Lapu-Lapu. Isip amahan sa dakbayan, ako mapasigarbohon sa maayong nimong hiyas ug buhat sa isig ka tawo nakaluwas ka og kinabuhi mao saludo ako kanimo,” matod ni Chan.
Wala magdahom si Arnado sa iyang nadawat nga pasidungog gumikan kay alang kaniya ang pagbuhat ra gayud sa insakto maoy iyang katuyoan sa pagluwas sa babayeng misuway og ambak sa Mandaue-Mactan Bridge.
Iyang gibutyag nga nakamatikod na siya daan sa babaye sa layo pa siya nga adunay planong lain gumikan kay naghubo na kini daan sa iyang tsinelas.
“Nag-ampo ra gyud ko nga ako siyang makuptan para di siya molampos sa iyang plano (ang babaye) mao to wa koy pagduha-duha ninaog gyud ko dayon. Salamat kaayo, Maayo ning makita sa akong anak nga magdako sila nga naa gyuy pagtan-aw sa ubang tawo ,” matod ni Arnado.
Si Arnado usa ka operator og tourist van nga grabeng naapektohan sa pandemya.
Hinungdan usa usab siya makapahimulos sa planong paghangyo sa kagamhanan sa IATF nga tugtan na ang mga langyawng turista nga makabisita sa dakbayan.
Mipasalig usab si Chan nga tagaan og prayoridad sa bakuna ang sama ni Arnado nga nabuhi sa turismo sa higayon nga aduna nay dugang suplay sa bakuna ang dakbayan.
Kini human nga adunay daghang dagkong kompaniya sa dakbayan ang planong mopalit og kaugalingong bakuna ug gikatakda usab silang mohatag og bahin sa kagamhanan nga libre. (GCM)