COTABATO CITY -- Pugsit ang kinabuhi sa usa ka kanhi barangay kapitan human misukol sa gilusad nga law enforcement operation sa kapulisan ug militar alas 4 sa kaadlawon, Huwebes, Abril 15 sa probinsya sa Maguindanao.
Naila ang napatay nga si Marcos Manunggal, kanhi Kapitan sa Barangay Tee Datu Salibo sa Maguindanao.
Nalit-ag sab ang upat ka sakop ni Manunggal nga sila Mike Guipal Badrudin, Nadia Kero, Arbaiya Bangkong Mustapha ug Ali Ebrahim.
Samtang nakaipsot sila Datumanot Manunggal alyas Ratunot Tugyas ug si Jaybee Mastura alyas Abu Naim.
Sumala kang Maguindanao Police Provincial Director Colonel Donald Madamba nga gironda sa hiniusang puwersa sa Criminal Investigation and Detection Group-Bangsamoro Autonomous Region (CIDG-BAR), PDEA-Barmm ug Maguindanao PNP uban sa Joint Task Force Central ang gipuy-an ni Manunggal sa Barangay Tee Datu Salibo.
Giingong misukol si Manunggal sa raiding team hinungdan nga siya napatay.
Narekober sa posisyon sa mga suspek ang mga tag-as nga matang sa armas, improvised explosive device (IED) mga bala ug mga personal nga kagamitan.
Gikanayon ni CIDG Maguindanao Field Unit Commander, Police Major Esmail Madin nga si Manunggal maoy lider sa Manunggal Group nga nalambigit sa gun running, gun-for-hire, extortion, illegal drug trade ug pagpamomba.
Ang mga suspek kanhi sakop ni AKP leader Kumander Tokboy Maguid ug karon nakig-alayon sa BIFF-ISIS inspired group nga gipangulohan ni Kumander Abu Toraifie.
Sa kasamtangan, nagpadayon ang paglutos sa militar ug kapulisan batok sa mga alipures ni Manunggal nga naka-ipsot sa gilusad nga law enforcement operation. (Edgar Fuerzas)