DAVAO DEL NORTE -- Nanawagan ang Davao del Norte Electric Cooperative (Daneco) ubos sa grupo sa National Electrification Administration (NEA) ngadto sa mga miyembro nga konsumante nga di magpailad ug mobayad lang sa ilang buhatan.
Kini ang panawagan sa legal counsel sa Daneco-NEA nga si Atty. Jorge Rapista.
Ang panawagan nahitabo atol sa paghinabi sa SuperBalita kang Rapista kagahapon sa alas dose sa udto didto sa buhatan sa Daneco-NEA sa Dakbayan sa Tagum.
Kini human nga gitaho nga duha ka semana na nga balik-operasyon ang grupo sa Daneco-Cooperative Development Authority (CDA).
"Ang resibo nga gihatagan og Authority to Print sa Bureau of Internal Revenue (BIR), anaa lamang sa Daneco-NEA. Mao nga dili gayud sila dapat magpailad," sulti ni Rapista.
Kanunay nga gipanawagan sa mga opisyales sa Davao del Norte ug Compostela Valley ang han-ay sa Daneco-NEA aron makahatag og katin-awan kabahin sa mga isyu sa kooperatiba kalabot sa pagsagubang niini sa Mindanao Power Crisis diin 2 oras ug traynta minutos nga nakasinati og inadlaw nga brownout ang mga molupyo sa duha ka mga probinsiya.
Niadtong Lunes, nangatubang sila Daneco-NEA Board of Director President Tomas Avila sa hawanan sa Provincial Board sa Davao del Sur aron usab mahatagan og katin-awan ang pamulong ni DOE Secretary Carlos Jericho Petilla nga putlan na og kuryente ang Daneco sa Enero sa 2016.
"Mao na nga hugot ang panawagan nato sa mga miyembro konsumante nga i-settle na ang ilang mga account aron magukod nato ang atong mga bayrunon," dugang ni Rapista.
Si BOD Avila usab mihatag og katin-awan nga aduna kunoy Operation Improvement Plan ang Daneco aron magukod ang dapat apson ug makasikad ang Daneco ug dili na maputlan og kuryente.