ANG amihanan sa Sugbu dugokonon sa mga lokal ug langyawng turista sa tuyo nga ilang masinate ug matagamtaman ang kanindot sa kinabuhi ug mga suroyanan nga gitanyag niini.
Aniay mga sampol, kinsay dili maglaway sa “tinap-anan”, “bingkang pinaliki”, manok Bisaya ug uban pa, gisamotan sa ilang nabantog nga baybayon.
Ang maong dapit usa sa inila nga summer getaway destination alang kanatong mga Sugbuanon.
Kanunay nga makabibihag ang Bantayan Group of Islands sa libo-an nga mga bisita ug usa na niini ang lungsod sa Sta. Fe.
Nagtanyag kini og mga lami-ang pagkaon nga very affordable ug ang kanindot sa mga baybayon.
Kinatarcan Island
Sa wala pa masuheto sa lugar usa kini ka batoon nga isla nga nahimutang sa taliwala sa mainland Cebu ug Isla sa Bantayan.
Ang isla usa ka bahin sa lungsod sa Sta. Fe nga gilangkuban sa tulo ka mga barangay ang Barangay Hagdan, Barangay Langub ug Barangay Bitoon (naila usab nga Barangay Kinatarcan, giisip nga “centro” sa isla).
Gitawag sa pipila ka mga lokal ang isla, Hagkilan, kumbinasyon sa tulo ka mga barangay.
Ang isla adunay gibana-bana nga 10,000 nga mga residente.
Unsaon pag-adto?
Kon manukad sa Cebu North Bus terminal sakay og bus paingon sa Daanbantayan ug kanaog sa merkado publiko diin ka mosakay og motorsiklo paingon sa pantalan sa Mahayahay.
Sa kadtong adunay pribadong sakyanan mamahimong ibilin sa parking area sa maong pantalan.
Adunay mga pumpboat nga nagbiyahian paingon sa isla.
Atraksiyon
Kon gustong mag-tour palibot sa Island of Kinatarcan, adunay duha nga kapilian ang pag subay sa dagat o paglibot diha sa islas sakay sa motorsiklo.
Laaw Lagoon -- Nakakita ka na og daghang “lato” kon seaweeds sa usa ka lagoon?
Dinhi sa Kinatarcan adunay Laaw Lagoon diin nahimutang ang lato plantation/propagation.
Ang lagoon nga gilibutan sa mga punoan sa kahoy ug mga dagkong limestones.
Apan ginadili ang paglangoy sa lagoon aron dili madaot ang lato.
Langub Cliff -- Ang bato-on nga isla nagtanyag ug daghang nga haom niadtong mga adventurer sama sa diving nga manukad sa pangpang sa Langub Cliff.
Ang pangpang gibana-banang adunay 15-20 ka tiil nga gihabugon, samtang tres metros ang gilawmon sa tubig.
Sa ilalom sa pangpang Makita ang kanindot sa marine life ilabi na ang mga gasang o corals.
Tamboan ni Leon -- Na-ila nga Coral Cliff diin ang mga
dagko nga balod mohampak sa pangpang nga adunay taas nga 50-60 ka tiil.
Pahimangno nga kon mosuroy sa dapit gikinahanglan nga dili hubog gumikan sa agianan nga hait ang mga gasang nga subayon.
Kusog sab ang hangi og hayan delikado niadtong maglisod sa ilang balanse.
Hagdan Beach -- Ang baybayon sa Barangay Hagdan diin lapad ang baybayon kon bout nimo mag-strolling ug haom alang sa romantic getaway.
Forest Beach -- Baybayon nga nahimutang sa Barangay Kinatarcan/Bitoon nga naghatag ug hippie-feels diin aduna kini jumping board, mahimo ka makapahuway sa mga duyan niini.
Nahimutang sa kasadpan nga bahin sa isla diin masaksihan nimo pagsawop sa adlaw.
Adunay mga payag nga ka-abangan, busa dili angayang mabalaka sa accommodation.
Tips
Limitado ang mga pumpboat nga nagbiyahe sa Kinatarcan Island siguruha nga naa sa pantalan sa wala pay 11:00 sa buntag.
Kanunaya ang pagsul-ob og mask.
Pagdala sa imong kaugalingon nga tubig mainom ug sunscreen aron paglikay sa sunburn.
Mas bintaha og magpa-booking daan sa tours ug accommodation.
Palihug ipatuman ang pagka-responsableng turista.
Leave no trace, imong basura sa ibulsa kon way makitang basurahan.
Gastohan
Bus -- Cebu City - Daanbantayan (vice versa) P600
Motorsiklo o traysikol – Daanbantayan Public Market - Mahayahay Port P20
Pump boat – Mahayahay Port - Pasil Beach, Kinatarcan P80
Motorsiklo – Island tour P250
Paingon sa Lawak - P250
Pagsulod / Bayad sa Kalikopan uban pang fees - 100
Pagkaon - P300
Impormasyon:
Lodging ug tours
Ninggahin kami usa ka gabii sa Forest Beach salamat kay Sir Berlito Mantao. Mahimo ninyong matawgan sa 0920380 4640.
Alang sa tour guide ug pagsakay sa motorsiklo mamahimong makontak si Fritz sa mobile phone no.: - 09382227931 / 09078859860.
***
Modawat og contributor
Sa mga “certified hinuroy” mamahimo ninyong i-submit sa Superbalita Cebu ang inyong kasinatian sa mga dapit nga inyong nasuroyan.
Higayon na nga mapatik dinhi sa pamantalaan ug sa Superbalita Cebu website ang inyong Suroy escapade.
Mamahimo ninyong i-submit ang inyong materials (maximum 500 words o 3,000 characters/high resolution pictures): florendaquerubin@gmail.com alang sa dugang pangutana mamahimong makatawag sa 09154410665. (Editor)