NAGKATAWA ko nga mihapak og hinay sa bukton sa lalaki dihang nailhan ko na siya ug ang kauban niyang babaye.
“Kamo man diay, Carlo, Mayeth.”
Unya mitan-aw ko kang Samuel nga nindot sab og smile ngadto kang Mayeth.
“Gipakalitan ta nila, Cleofe.”
Mikidhat si Samuel nako.
“Bitaw. Nganong karon pa man ta makakita aning duha?”
Gipahimutang nila ni Carlo ug Mayeth ang ilang mga pagkaon og drinks sa ibabaw sa lamesa nga nahimutangan namo ni Samuel. Alegre ang panagsulti namong upat.
“Last natong panagkitang tulo, Carlo, Mayeth, sa atong graduation ceremony sa hayskol. After that, wa na mi makabalita si Samuel ninyong duha ni Mayeth.”
Miseryuso ko nga mipasiplat kang Carlo. Mipasiplat sab siya nako. Ug namatikdan sab nako nga nagpasiplatay sila si Samuel ug Mayeth.
“After sa atong graduation sa hayskol, Cleofe, miadto ko sa Bohol.
Nakahibawo na bitaw ka nga taga Bohol ko ug mianhi lang ko sa Cebu
ug nagpuyo sa balay sa akong mga apohan kay gusto kong anhi sa Cebu
motungha sa hayskol.”
Miyangu-yango ko. Nagkatinan-away mi si Samuel.
“So, sa ato pa, didto ka na mopadayon sa pag-eskuwela sa college, Carl?”
Miinom ko sa akong drinks. Gitan-aw ko pagayo si Carlo. Mitando siya.
“Oo. Pero karon, mibalik ko sa Cebu. Nagpuyo lang kog boarding house. Mibalhin kog eskuwela dinhi, karong semestera lang.”
“Mao ba.”
Gitan-aw ko si Samuel. Nakasabot siya sa akong tinan-awan niya. Iyang
giatubang si Mayeth.
“Ikaw diay, Mayeth, nganong karon ka pa man namo makita ni Cleofe?”
Nagpaminaw lang ko sa panagsulti nila ni Samuel ug Mayeth.
“You know, Samuel. Pagkahuman sa atong graduation sa hayskol, namalhin na mig puyo sa siyudad mao nga nawala na mi sa lungsod nga atong gipuy-an. Wa ko kapahibawo ninyo ni Cleofe ani kay wa man koy selpon. Diha na man ko paliti nila ni Mama ug Papa og selpon dihang nagtungha na ko sa college.”
Nagkatinan-away mi si Samuel ug nagkadungan mi sa pagyangu-yango. (Sumpayan)