GIDUGOK sa mga tawo ang healing mass sa usa ka pari kay daghan sa mga nitambong niini milagrusong nangaayo sa ilang mga sakit.
Sa kamahal sa doktor, kinsay di gustong maayo pinaagi sa milagro? Libre pa gyud.
Giduol sa pari ang usa ka tawo ug gipangutana, “Brod, unsay gusto nimong akong ampoan?” Tubag sa tawo, “Ang akong hearing, Dre.”
Gitapion dayon sa pari ang iyang duha ka kamot sa duha ka dunggan sa maong tawo ug nag-ampo. Pagkahuman, nangutana ang pari. “Kumusta na
ang imong hearing, Brod?”
Tubag sa tawo, “Sa Lunes pa man ang akong hearing, Dre, a Regional Trial Court.”
Sunod giingnan sa pari ang usa ka tawo, “Brod, barug ug lakaw padung nako.” Mibarog ang tawo ug hinay nga milakaw padung sa pari. Matod sa pari, “Karon nga makalakaw ka na, unsay imong ikasulti?”
Tubag sa tawo, “Di gihapon ko makakita, Dre.”
***
Apan dunay tinuod nga milagro nga nahitabo niadtong buntag sa Biyernes, Abril 9, 2021. Mao kini ang pagluwas ni Ritchie Arnado, 43 anyos nga Lalamove driver nga taga Deca 4, Bangkal, Lapu-Lapu City, sa usa ka 23-anyos nga dalaga nga moambak unta sa unang Mactan bridge.
Makaingon kitang milagro kay ang unang Mactan bridge di maoy naandan nga agian ni Arnado paingon sa Siyudad sa Sugbo. Ug sa tukmang mga gutlo, naabtan pa niya ang babaye ug naluwas sa tinong kamatayon.
Sa kakalit sa hitabo, nagtiniil na lang si Arnado, wa na siya makasul-ob sa iyang mask. Ang iyang na lang nahinumdoman mao ang mga pulong sa dalaga, “Buhii ko, Kuya! Buhii ko, Kuya.” Apan wa niya buhii ang dalaga
hangtod nga niabot ang mga pulis.
***
Gipasidunggan ni LapuLapu City Mayor Junard Chan si Arnado nga giila niya nga usa ka modern day hero. Matod pa sa mayor, “Ikaw ang tinuod anak ni Lapulapu. Isip amahan sa dakbayan, ako mapasigarbohon sa maayong nimong hiyas ug buhat sa isig ka tawo nakaluwas ka og kinabuhi mao saludo ako kanimo.”
Naatol ang pagluwas ni Arnado sa dalaga pagsaulog sa Araw ng Kagitingan. Apan wa magdahom si Arnado sa iyang nadawat nga pasidungog.
Alang kaniya ang pagbuhat ra gayud sa insakto maoy iyang tuyo sa pagluwas sa dalaga.