WA PAY kalambigitan ang kamatayon sa usa ka lumolupyo sa Barangay Tanke sa Dakbayan sa Talisay sa bakuna, sumala sa Department of Health (DOH) 7 samtang nagpadayon pa ang ilang pakisusi.
Bisan tuod kon nagpadayon pa ang ilang pakisusi, angay nga klaruhon sa DOH ngadto sa publiko kon duna bay kalambigitan ang bakuna batok sa coronavirus disease 2019 (Covid-19) sa iyang kamatayon pinaagi sa pagtumaw og balik sa iyang hubak.
Namatay si Sydney Rose Panimdim, 37, human hubaka og maayo nga nisangko sa kalisod sa iyang pagginhawa. Nagsugod ang hubak, matod sa mga taho, dihang siya nabakunahan.
Gikataho usab nga wa siya mosulti nga siya hubakon.
Dinhi makita usab ang ka importante sa pagtug-an sa kati nuod sa mga sakit nga gipamati, miagi ug nagpadayon pa hangtod karon. Pinaagi niini, ma-evaluate og maayo sa mga doktor kon angay ka bang dapatan o di. Importante mahibaw-an sa team sa mo inject kon unsa nga klase sa sakit ang imong gihambin.
Kon wa kay gipamati o pagtan-aw sa team nga okay ka rang bakunahan, di ka angay mahadlok nga magpatusok kay seguradong di ka dapatan sa bakuna kon ikaw mahimutang sa kakuyaw o ilang makita nga duna kay risgo.
Hayan si Panimdim di mabakunahan, kana kon tinuod nga wa siya mosulti, kon nisulti pa siya nga naa siyay hubak sa nangaging katuigan. Ang iyang kaso hayan maoy labing una nga grabe dinhi sa nasod sukad gisugdan niadtong sayo sa Marso 2021 ang pagpamakuna. Nakapahadlok kini sa iyang mga silingan sa Tanke nga nagpanagana na hinuon sa pagpa inject.
Sa tanang mga klase sa bakuna batok Covid-19, ang AstraZeneca lang ang dunay pipila ka di maayong reaksyon sa mga pasyente sa ubang nasod. Apan debatihunon pa kini. Ang ubang mga bakuna wala.
Mas dako ang risgo sa imong kinabuhi kon di ka magpabakuna. Kon way kay gipamati sa lawas, pagpatusok gyud.