2 na nalumos sa pool sa condotel sa Mactan; Chan nimando ipasira

GIPAHIBAWO ni Lapu-Lapu City Mayor Junard Chan sa publiko nga temporaryo

dili ipagamit ang swimming pool sa usa ka condotel sa Barangay Mactan, Dakbayan sa Lapu-Lapu human sa insidente diin duha na ka bata ang nalumos sa swimming pool niini.

Ang labing uwahing insidente nahitabo niadtong Marso 2021.

Matod ni Chan nga iyang nang nahinabi ang tagdumala sa condotel ug sila na mismo ang nakadesisyon nga dili lang una ipagamit ang ilang swimming pool samtang aduna pay usbon nga mga safety measures kalabot niini.

Unang nasuta sa mayor nga walay nakabutang pila ka tiil ang gilawmon sa swimming pool ug ikaduha mao nga walay lifeguard sa swimming pool.

Personal nga gibisita sa mayor ang condotel aron personal nga matan-aw human makadawat ug reklamo kalabot sa duha ka insidente sa pagkalumos sa mga bata.

Nikooperar ra ang management niini, sumala sa mayor, ug mipasalig nga dili paligoan ang ilang swimming pool hangtod nga dili malatag ang dugang safety measures nga gipangayo sa kagamhanan aron kalikayan ang mga insidente sa lumos.

Iya na usab gimandoan ang City Engineering Office pagimbestigar ngano natagaan og occupancy permit ang naasoyng condotel nga duna pa man diay kini kulang nga mga papeles.

Nasayran nga business permit lang sa developer ang gigamit niini ug wala pay labot ang pagturn over sa modumala unta.

Mibutyag si Chan nga wala ra kinahanglana nga pasirad-an ang condotel sanglit wala man silay laing violation nga nabuhat gawas lang sa insidente sa lumos.

“Katong ilang gitawag ug aqua pool nga daghang madisgrasyahan ipa redesign gyud to siya nga ma open to siya nga klase nga pool kay

delikado gyud,” matod ni Chan. (GCM)